ކަނޑުގެ ބޮޑު މުއްސަނދިކަން ފަރުވާތެރިކަމާއެކު ދިރާސާކޮށް ތަރައްގީ ކުރުމަކީ، ދެމެހެއްޓެނިވި ގޮތެއްގައި ވަސީލަތްތައް ބޭނުންކުރުމަށް އައު ދޮރުތަކެއް ހުޅުވިގެންދާނެ ކަމެއް ކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.

ޝިޔާމް މިފަދައިން ވިދާޅުވެފައި ވަނީ ސްޕެޝަލް އިކޮނޮމިކް ޒޯން(އެސްއީޒެޑް)ގައި ކުރެވޭ އެ ބާވަތުގެ މަސައްކަތްތައް ހިމަނުއްވައި ރައީސް ޑރ. މުހައްމަދު މުއިއްޒު ނެރުއްވި ގަރާރަށް އިސްލާހު ގެނެސް އިއްޔެ ވަނީ ތެލާއި ގޭހާއި މިނެރަލް އެކްސްޕްލޮރޭޝަން މަސައްކަތްތައް ހިމަނުއްވާފައި ވާތީ އެމްޑީޕީ ސަރުކާރުގެ އެންވަޔަރަމަންޓް މިނިސްޓަރުކަން ކުރެއްވި އައިމިނަތު ޝައުނާ ދެއްކެވި ވާހަކަފުޅަށް ރައްދު ދެއްވާ އެކްސްގައި ކުރެއްވި ޕޯސްޓެއްގައެވެ.

ޝައުނާ ވަނީ ދިވެހިރާއްޖޭގައި ކަނޑުގެ ފުން ސަރަހައްދުތަކުން މައުދަން ނެގުމާއި ތެޔޮ ހޯދުމަށް ހުއްދަދޭ މާއްދާތަކެއް ތަސްދީގު ކުރެއްވުމުން ނުހަނު ކަންބޮޑުވާ ކަމަށް ވިދާޅުވެފައެވެ.

"މިއީ ހެދޭ ވަރަށް ބޮޑު ގޯހެކެވެ. މީގެ ސަބަބުން ކަނޑުގެ ދިރުންތަކަށް ނުރައްކާވެ، މަސްވެރިކަން ކުރާ ސަރަހައްދުތައް ސުންނާފަތިވެ، އަދި ރާއްޖޭގެ ފަތުރުވެރިކަމުގެ އަގު ވެއްޓިގެންދާނެއެވެ،" ޝައުނާ ވިދާޅުވިއެވެ.

ޝައުނާ އަށް ރައްދު ދެއްވާ ޝިޔާމް ކުރެއްވި ޕޯސްޓުގައި ފަތުރުވެރިކަމާއި މަސްވެރިކަމުގެ ބޭރުން ދިވެހި އިގްތިސޯދު ސިންދަފާތުކުރުމަށް ރައީސް މުއިއްޒު ގެންގުޅުއްވާ އިސްތިރާތީޖީ ރޭވުމަކީ، ދިގު މުއްދަތުގެ ސާބިތުކަމަށްޓަކައި އެޅުއްވި ދުރުވިސްނޭ އަދި އަމަލީ ފިޔަވަޅެއް ކަމަށް ވިދާޅުވިއެވެ.

ރާއްޖޭގެ އިގްތިސޯދަކީ ބޭރުގެ ލޮޅުންތަކަށް ނާޒުކު އިގްތިސޯދަކަށް ވީހިނދު، އިގްތިސޯދީ ބިންގާ ފުޅާކުރުމުން އެފަދަ ނުރައްކާތައް ކުޑަވެ، ކުރިއެރުމަށްޓަކައި އިތުރަށް ހަރުދަނާ އަސާސެއް ގާއިމުވެގެންދާނެ ކަމަށް ޝިޔާމް ވިދާޅުވިއެވެ.

"ދުނިޔޭގެ އެންމެ ބޮޑު ހާއްސަ އިގްތިސޯދީ ސަރަހައްދުތަކުގެ ތެރޭގައި ހިމެނޭ ގާތްގަނޑަކަށް 900,000 އަކަކިލޯމީޓަރުގެ ސަރަޙައްދެއް އަޅުގަނޑުމެންނަށް ލިބިފައިވީ ނަމަވެސް، މިހާތަނަށް އަޅުގަނޑުމެންނަށް މި ސަރަހައްދުގެ ބޭނުން ހިފިފައިވަނީ މައިގަނޑު ގޮތެއްގައި ކަނޑުމަހުގެ މަސްވެރިކަމުން އެކަންޏެވެ. ކަނޑުގެ މި ބޮޑު މުއްސަނދިކަން ފަރުވާތެރިކަމާއެކު ދިރާސާކޮށް ތަރައްޤީކުރުމަކީ، ދެމެހެއްޓެނިވި ގޮތެއްގައި ވަސީލަތްތައް ބޭނުންކުރުމަށް އައު ދޮރުތަކެއް ހުޅުވިގެންދާނެ ކަމެކެވެ،" ޝިޔާމް ވިދާޅުވިއެވެ.

އޭނާ އިތުރަށް ވިދާޅުވީ އެކަނ ކުރާނީ ގައުމީ މަސްލަހަތުތަކާ އެއްގޮތަށް، އިތުބާރު ހުރި އަދި ގާބިލު އިންވެސްޓަރުންނާ ގުޅިގެން ކަމަށެވެ. އަދި މޫސުމަށް އަންނަ ބަދަލުތަކުގެ ނުރައްކާ އެންމެ ބޮޑަށް ކުރިމަތިވެފައިވާ އެއް ގައުމުގެ ހައިސިއްޔަތުން، ކޮންމެ އައު ހަރަކާތެއްގައިވެސް އަމަލުކުރާނީ ނުހަނު ސަމާލުކަމާއެކު ކަމަށްވެސް ވިދާޅުވިއެވެ.

"ކޮންމެ ދިރާސާއެއް ނުވަތަ ތަރައްގީގެ މަޝްރޫއުއެއް ކުރިއަށްގެންދާނީ ދެފުށް ފެންނަ، ހަރުދަނާ ތިމާވެށީގެ އެސެސްމަންޓްތަކެއް ހެދުމަށްފަހުގައެވެ. އަދި ދިރުންތަކުގެ މުއްސަނދިކަމާއި ދިގު މުއްދަތުގެ ދެމެހެއްޓެނިވިކަމަށް އެއްވެސް އުނިކަމެއް ނާންނާނެކަން ކަށަވަރުކުރެވޭނެއެވެ،" ޝިޔާމް ފާހަގަކުރެއްވިއެވެ.

މިހާރު އޮތް ހާލަތުގައި ތިބުމަކީ ކުރެވޭނެ ކަމެއް ނޫން ކަމަށާއި އިގްތިސޯދީ ސާބިތުކަން ވަރުގަދަކޮށް، އަމިއްލަ ފައިމައްޗަށް ތެދުވެފައިވާ މުސްތަގުބަލެއް ކަށަވަރުކުރުމަށް މަސައްކަތްކުރަންޖެހޭ ކަމަށް ޝިޔާމް ވިދާޅުވިއެވެ.