އިންޑިއާ އާއި ވިލާތުގެ އިއްތިހާދު (އީޔޫ) އާ ދެމެދު ދެ ބިލިއަން މީހުންގެ މިނިވަން ވިޔަފާރީގެ ސަރަހައްދެއް ގާއިމުކުރުމުގެ ބޮޑު އެއްބަސްވުން ގާއިމްކޮށްފިއެވެ.

މިއަދު އިންޑިއާގެ ވެރިރަށް ނިއުދިއްލީއަށް ކުރެއްވި ޒިޔާރަތުގެ ތެރެއިން އެކްސްގައި ކުރެއްވި ޕޯސްޓެއްގައި ޔޫރަޕިއަން ކޮމިޝަންގެ ރައީސާ ފޮން ޑަ ލޭޔަން ވަނީ، ދެ ފަރާތުން މިއަދު "ތާރީހު އިއާދަކޮށްފައީ" ކަމަށް ވިދާޅުވެފައެވެ.

"އަޅުގަނޑުމެން މިވަނީ އެންމެ ބޮޑު އަދި އެންމެ މުހިންމު އެއްބަސްވުން ނިންމާލާފައި. ދެ ފަރާތަށްވެސް ފައިދާވާނެ ގޮތަށް، ދެ ބިލިއަން މީހުންގެ މިނިވަން ވިޔަފާރީގެ ސަރަހައްދެއް އަޅުގަނޑުމެން މިވަނީ އުފައްދާފައި،" އޭނާ އިތުރަށް ވިދާޅުވިއެވެ.

މި ތާރީހީ އެއްބަސްވުމަށް އާދެވިފައިވާކަން އިންޑިއާގެ ބޮޑުވަޒީރު ނަރެންދުރަ މޯދީ ކަށަވަރުކޮށްދެއްވީ، ފޮން ޑަ ލޭޔަން އަދި ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާއާ ބައްދަލުކުރެއްވުމުގެ ކުރިންނެވެ. މޯދީ ވަނީ އެ އެއްބަސްވުމުގެ ފައިދާތަކަށް ތައުރީފު ކުރައްވައިފައެވެ.

"މި އެއްބަސްވުމުގެ ސަބަބުން އިންޑިއާގެ 1.4 ބިލިއަން މީހުންނަށާއި އީޔޫގެ އެތައް މިލިއަން ރައްޔިތުންނަށް ގިނަގުނަ ފުރުސަތުތަކެއް ލިބިގެންދާނެ،" މޯދީ ވިދާޅުވިއެވެ.

މި އެއްބަސްވުމަކީ ދުނިޔޭގެ ޖުމްލަ އުފެއްދުންތެރިކަމުގެ (ޖީޑީޕީ) ގާތްގަނޑަކަށް 25 އިންސައްތަ ހިއްސާކުރާނެ އެއްބަސްވުމެއް ކަމަށާއި، މީގެ ސަބަބުން ފޭރާމާއި، ގަހަނާ އާއި، ހަންގަނޑުގެ އުފެއްދުންތައް ހިމެނޭ ސިނާއަތްތަކަށް ކުރިއެރުން ލިބޭނެ ކަމަށް މޯދީ ވިދާޅުވިއެވެ. އީޔޫގެ އޮފިޝަލުން ވިދާޅުވާ ގޮތުގައި މިއީ އިންޑިއާއިން މިހާތަނަށް އެއްބަސްވި އެންމެ ފުޅާ ދާއިރާއެއްގެ ވިޔަފާރީގެ އެއްބަސްވުމެވެ.

މި އެއްބަސްވުމަށް އާދެވިފައި މިވަނީ އެމެރިކާއިން އިމްޕޯޓް ޑިއުޓީ ބޮޑުކުރުމާއި ޗައިނާއިން އެކްސްޕޯޓް ކޮންޓްރޯލް ކުރުމާ ގުޅިގެން، ބްރަސަލްސް އާއި ނިއުދިއްލީން އާ މާކެޓްތައް ހޯދުމަށް މަސައްކަތް ކުރަމުންދާ ދަނޑިވަޅެއްގައެވެ. މި އެއްބަސްވުމުގެ ސަބަބުން، ދުނިޔޭގެ އެންމެ އާބާދީ ބޮޑު ގައުމު ކަމަށްވާ އިންޑިއާގެ ބޮޑު އަދި ރައްކާތެރިކުރެވިފައިވާ މާކެޓް، އެ ގައުމުގެ އެންމެ ބޮޑު ވިޔަފާރީގެ ބައިވެރިޔާ ކަމަށްވާ 27 ގައުމު ހިމެނޭ އީޔޫއަށް ހުޅުވިގެންދާނެއެވެ.

އިންޑިއާއަކީ މުސްތަގުބަލުގެ މުހިންމު މާކެޓެއްގެ ގޮތުގައި ދެކޭ އީޔޫއިން ބުނީ، އިންޑިއާގެ މާކެޓަށް ފުރަތަމަ ވަންނަ ފަރާތްތަކުގެ ގޮތުގައި ޔޫރަޕްގެ ކުންފުނިތަކަށް ބޮޑެތި ފައިދާތަކެއް ލިބޭނެ ކަމަށެވެ. ހަމައެއާއެކު، އިންޑިއާއިން ދެކޭގޮތުގައި ޔޫރަޕަކީ ޓެކްނޮލޮޖީއާއި އިންވެސްޓްމަންޓް ހޯދުމަށް އޮތް މުހިންމު މަސްދަރެކެވެ.

މި އެއްބަސްވުމުގައި ރަސްމީކޮށް ސޮއިކުރާނީ ގާނޫނީ ގޮތުން ބަލަންޖެހޭ ކަންކަން ބެލުމަށްފަހުގައެވެ. އެ މަސައްކަތަށް ފަހެއް ނުވަތަ ހަ މަސް ދުވަސް ނަގާނެ ކަމަށް ބެލެވޭ ކަމަށް، މިކަމުގެ މައުލޫމާތު އެނގޭ އިންޑިއާ ސަރުކާރުގެ އޮފިޝަލަކާ ހަވާލާދީ ރޮއިޓާސް ނިއުސް އެޖެންސީން ރިޕޯޓްކޮށްފައިވެއެވެ. އެ އޮފިޝަލް ވިދާޅުވި ގޮތުގައި އެއް އަހަރު ދުވަހުގެ ތެރޭގައި މި އެއްބަސްވުމަށް އަމަލުކުރަން ފެށޭނެ ކަމަށް އުންމީދު ކުރެވެއެވެ.