ރާއްޖޭގެ ފަތުރުވެރިކަމުގެ އެއް ބާނީ، ނިޝާން މުލީގޭ ޝަރަފުގެ އިއްޒަތުގެ ވެރިޔާ ކޮލިގޭ މުހައްމަދު އުމަރު މަނިކު (އެމްޔޫ މަނިކު) މިއަދު ހެނދުނު އަވަހާރަވެއްޖެއެވެ. މީގެ ބައި ގަރުނު ކުރިން ރާއްޖެއަށް ފަތުރުވެރިކަން ތައާރަފް ކުރެއްވި އެއް ބާނީ އަވަހާރަވެވަޑައިގެންނެވީ ސިންގަޕޫރުގައި ފަރުވާ ހޯއްދަވަމުން ގެންދަވަނިކޮށެވެ.

އެމްޔޫ މަނިކު އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެފައިވަނީ، ރާއްޖޭގެ ފަތުރުވެރިކަން މިއަދާ ހަމައަށް ތަރައްޤީވެ ކުރިއަރައި ދިޔުމުގައި އެމަނިކުފާނު ކުރައްވާފައިވަނީ، ތަޢުރީފް ޙައްޤު މަސައްކަތްޕުޅުތަކެއް ކަމަށެވެ. އަދި ރާއްޖެ ދުނިޔޭގެ ފެންވަރުގައި ފާހަގަކޮށްލެވޭ ފަތުރުވެރިންގެ ޚާއްޞަ މަންޒިލަކަށް ހެއްދެވުމުގައި އެމަނިކުފާނުގެ ދައުރު ނުހަނު ބޮޑު ކަމަށް ފާހަގަކުރައްވާފައިވެއެވެ.

ކުރީގެ ރައީސް އިބްރާހިމް މުހައްމަދު ސާލިހު (އިބޫ) ވިދާޅުވެފައިވަނީ އެމްޔޫ މަނިކަކީ ފަތުރުވެރިކަމުގެ ސިނާއަތް ކުރިއެރުވުމަށް ގިނަ ޚިދުމަތްތަކެއް ކުރެއްވުމުގެ އިތުރުން، ދިވެހި ދައުލަތަށް 19 އަހަރަށްވުރެ ގިނަ ދުވަހު ޚިދުމަތް ކުރައްވާފައިވާ ޚިދުމަތްތެރިއެއް ކަމަށެވެ. އަދި އިޖްތިމާއީ ދާއިރާއިން ވެސް، ޚާއްޞަކޮށް ޞިއްޙީ އަދި ތަޢުލީމީ ދާއިރާއަށް ގިނަގުނަ ޚިދުމަތްތަކެއް ކޮށްދެއްވާފައިވާ ކަމަށް ފާހަގަކުރައްވާފައިވެއެވެ.

ކުރީގެ ރައީސް އަބްދުﷲ ޔާމީން އަދި ނައިބު ރައީސް ހުސައިން މުހައްމަދު ލަތީފު ވެސް އެމްޔޫ މަނިކު އަވަހާރަވުމާ ގުޅިގެން ތައުޒިޔާ ދަންނަވާފައިވެއެވެ. އެމަނިކުފާނަކީ ރާއްޖޭގެ ފަތުރުވެރިކަމުގެ ސިނާއަތު ކުރިއެރުވުމަށް ގިނަގުނަ މަސައްކަތްތަކެއް ކުރައްވާފައިވާ ބޭފުޅެއްކަން ފާހަގަކުރައްވާފައިވެއެވެ.

އެމްޔޫ މަނިކަކީ މީގެ ބައި ގަރުނު ކުރިން ރާއްޖެއަށް ޓޫރިޒަމް ތައާރަފްކޮށް، އެ ސިނާއަތުގެ ނަފާއިން ރާއްޖެ މުއްސަނދި ކުރެއްވުމަށް މަގުފަހިކޮށްދެއްވި އެއް ބާނީއެވެ. އެމަނިކުފާނުގެ އަވަހާރަވުމާ ގުޅިގެން ގިނަ ބަޔަކު ދަނީ ސޯޝަލް މީޑިއާގެ އެކި ޕްލެޓްފޯމްތަކުގައި ތައުޒިޔާ ފާޅުކުރަމުންނެވެ.

މަނިކު އަވަހާރަވެފައި ވަނީ އުމުރުފުޅުން 78 އަހަރުގައެވެ. އެމްޔޫ މަނިކު އަވަހާރަވީ އާލާސްކަންފުޅާއި ގުޅިގެން ސިންގަޕޫރުގެ މައުންޓް އެލިޒަބަތު ހޮސްޕިޓަލުގައި ފަރުވާދެމުންދަނިކޮށެވެ.

އެމްޔޫ މަނިކަކީ ރާއްޖޭގައި މަތީ ފަންތީގެ ގިނަ ރިސޯޓުތަކެއް ހިންގަމުން އަންނަ ޔުނިވާސަލް އެންޓަޕްރައިޒަސްގެ ޗެއާމަންވެސްމެއެވެ. އެމްޔޫ މަނިކަކީ އެންމެ ފުރަތަމަ ފަތުރުވެރިކަން ރާއްޖޭގައި ފެށި ބޭފުޅުންގެ ތެރޭގައި ހިމެނޭ ބޭފުޅެކެވެ.

އެމްޔޫ މަނިކަކީ ރާއްޖޭގެ ޓޫރިޒަމް ދާއިރާއަށް ގިނަގުނަ ޚިދުމަތްތަކެއް ކުރައްވާފައިވާ ބޭފުޅެކެވެ. މި ޚިދުމަތްތަކުގެ އަގުވަޒަންކުރުމުގެ ގޮތުން 2011 ވަނަ އަހަރު ދިވެހި ދައުލަތުގެ އިއްޒަތް އެމަނިކުފާނަށް ވަނީ އެރުވިފައެވެ.

މީގެ އިތުރުން އެމަނިކުފާނަށް ވަނީ 1982 ވަނަ އަހަރު ހިތްވަރު ދިނުމުގެ އިނާމާއި، 2002 ވަނަ އަހަރު ޝަރަފުވެރިކަމުގެ އިނާމު ލިބިވަޑައިގެންފައެވެ.

އަދި ރާއްޖޭގެ މިނިވަންކަމަށް 25 އަހަރު ފުރުމުގެ މުނާސަބަތުގައި ދެވުނު ޚިދުމަތުގެ އިނާމާއި، ދައުލަތަށް ގިނަދުވަހު ޚިދުމަތް ކުރެއްވި އިއްޒަތްތެރިއެއްގެ ލަގަބު ވެސް އެމަނިކުފާނަށް ވަނީ ލިބިވަޑައިގެންފައެވެ.

އޭނާ ވަނީ ސަރުކާރުގެ އެކި ކުންފުނިތަކުގެ ޗެއާމަންކަމާއި ބޯޑު މެމްބަރުކަމުގެ މަޤާމުތައް ފުރުއްވާފައެވެ. އެގޮތުން އެންމެ ފާހަގަކޮށްލެވެނީ 2013 އިން 2022 އަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޗެއާމަންކަން ކުރެއްވުމެވެ.

އެމްއޭސީއެލްގެ ޗެއާމަންކަން ކުރެއްވި ދުވަސްވަރަކީ ވެލާނާ އިންޓަނޭޝަނަލް އެއާޕޯޓުގެ ތަރައްގީގެ އެންމެ ގިނަ މަޝްރޫއުތައް ހިންގުނު ދުވަސްވަރެވެ. މީގެ ތެރޭގައި ރަންވޭ، ޕެސެންޖަރ ޓާމިނަލް އަދި ސީޕްލޭން ޓާމިނަލް ތަރައްގީކުރުން ހިމެނެއެވެ.

މީގެ އިތުރުން އޭނާ ވަނީ އައިލެންޑް އޭވިއޭޝަންގެ ޗެއާމަންކަމާއި، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޯޑު މެމްބަރުކަން ވެސް އަދާކުރައްވާފައެވެ.