ހޯމް މިނިސްޓްރީގައި ހިމެނޭ ސިޔާސީ މުވައްޒަފުން ހިމެނޭ "ހޯމް ޓީމެއްގެ" ފަރާތުން ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) އޮފީހުގެ ތެރޭގައި ޕީއެންސީ އަށް މެންބަރުން އިތުރު ކުރުމަށް މެމްބާޝިޕް ފޯމުތަކެއް ފުރާފައިވާނެ ކަމަށް ހޯމް މިނިސްޓްރީގެ ސްޓޭޓް މިނިސްޓަރު އަބްދުލް މަޖީދު އިބްރާހިމް ވިދާޅުވެއްޖެއެވެ.

ސައްހަ ނޫން ފޯމު ހުށަހަޅައިގެން ޕީއެންސީ އަށް މެންބަރުން އިތުރު ކުރާ މައްސަލައެއް ވަނީ ފެންމަތިވެފައެވެ. އަދި އޭގެތެރެއިން ގިނަ ފޯމުތަކެއް ހޯމް މިނިސްޓްރީގެ ބެލުމުގެ ދަށުގައި ހުންނަ ޑީއެންއާރް އޮފީސް ތެރޭގައި ފުރާ މަންޒަރު ފެންނަ ފޮޓޯތަކެއް ސޯޝަލް މީޑިއާގައި ވެސް ވަނީ އާއްމުވެފައެވެ.

އެ ފޮޓޯތަކުން ފެންނަނީ މީޓިން ރޫމެއް ކަހަލަ ތަނެއްގައި ހޯމް މިނިސްޓަރު އިހުސާން ވެސް ހިމެނޭހެން އެ މިނިސްޓްރީގެ ސިޔާސީ މުވައްޒަފުންތަކެއް ޕީއެންސީ އަށް މެންބަރުން އިތުރުކުރުމަށް ފޯމު ފުރާ މަންޒަރު ފެނެއެވެ. އަދި ހަމަ އެ ތަނުގައި ޕިއްޒާ ކާން ތިބޭ މަންޒަރު ފެންނަ ފޮޓޯތަކެއް ވެސް ވަނީ ދައުރުވެފައެވެ.

އެ ފޮޓޯތަކުން ހޯމް މިނިސްޓަރު އިހުސާންގެ އިތުރުން ހޯމް މިނިސްޓްރީގެ ސްޓޭޓް މިނިސްޓަރު އަބްދުލް މަޖީދު އިބްރާހިމާއި ޑެޕިއުޓީ މިނިސްޓަރު އަހުމަދު އަލީ ވެސް ފެނެއެވެ. މި ފޮޓޯތަކާއި ގުޅިގެން ހޯމް މިނިސްޓްރީ އަށާއި ޕީއެންސީ އަށް ގިނަ ބަޔަކު އަންނަނީ ފާޑު ކިޔަމުންނެވެ.

މި މައްސަލަ ފެންމަތިވެފައި ވަނިކޮށް ޑީއެންއާރްގެ މަސައްކަތްތައް ކުރިޔަށްދާ ގޮތް ދައްކާލުމުގެ ގޮތުން މިއަދު މެންދުރު 13:00ގައި ނޫސްވެރިން ވަނީ އެތަނަށް ގެންގޮސްފައެވެ. އަދި ދައުރުވެފައިވާ ފޮޓޯތަކުން ފެންނަ މީޓިން ރޫމު ނޫސްވެރިންނަށް ދައްކާލިއެވެ.

އެއަށްފަހު ނޫސްވެރިންނަށް ސުވާލު ކުރުމުގެ ފުރުސަތު ހުޅުވާލިއެވެ. ނަމަވެސް މަޖީދު ވަނީ މިއަދުގެ ބައްދަލުވުމަކީ ޑީއެންއާރްގެ މަސައްކަތްތައް ކުރިޔަށްދާ ގޮތް ދައްކާލުމަށް ބޭއްވި ބައްދަލުވުމަކަށް ވާތީ އެކަމާ ގުޅުންހުރި ސުވާލުތައް ކުރުމަށް ނޫސްވެރިންގެ ކިބައިން އެދިފައެވެ.

ނޫސްވެރިންނަށް ދައްކާލި މީޓިން ރޫމާ ގުޅޭ ގޮތުން ވާހަކަދައްކަވަމުން މަޖީދު ވިދާޅުވީ އެއީ ޑީއެންއާރްގެ ތެރޭގައި މުޅިން ވަކިން ހުންނަ މީޓިން ރޫމެއް ކަމަށާއި ކޮންމެ ޑިޕާޓުމަންޓަކުން އެދުނަސް އެ މީޓިން ރޫމް ބޭނުން ކުރެވޭނެ ކަމަށެވެ.

އޭނާ ވަނީ އެ މީޓިން ރޫމުގައި ޕީއެންސީ އަށް ފޯމު ފުރުމުގެ މަސައްކަތްތަކެއް ކުރިޔަށް ދިޔަކަން އެއްބަސްވެވަޑައިގެންފައެވެ. ވިދާޅުވީ އެ މަސައްކަތް ކުރީ މިނިސްޓަރު އަލީ އިހުސާން އިސްވެ ހުންނަވައިގެން އެކުލަވާލި "ހޯމް ޓީމް" އިން ކަމަށެވެ.

"މިނިސްޓްރީ އޮފް ހޯމް ލޭންޑްގައި ސިޔާސީ މީހުންގެ ގޮތުގައި ތިބި ހުރިހާ ފަރާތްތަކަށް ވެސް އެ ފަރާތެއް މެދުވެރިކޮށް ޕާޓީ އަށް މެންބަރުން އިތުރު ކުރުމަށްޓަކައި މެންބަރުން ވެއްދުމުގެ ކަންކަން ގެންގޮސްދިނުމަށް އެދިފައި އޮތީ،" މަޖީދު ވިދާޅުވިއެވެ.

ނަމަވެސް އެ މައްސަލާގައި ނޫސްވެރިން އިތުރަށް ސުވާލުތައް ކުރަން ފެށުމުން ޕްރެސް ކޮންފްރަންސް ދޫކުރައްވައި މަޖީދާއި އާލީ އެތަނުން ވަޑައިގެންނެވިއެވެ. ތަކުރާރުކޮށް ނޫސްވެރިން ސުވާލު ކުރުމުން ވެސް ގިނަ ސުވާލުތަކަކަށް ޖަވާބެއް ނުލިބުނެވެ.