ސަރުކާރު ހިންގާ މައިޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް މެންބަރުން އިތުރު ކުރުމަށް، ކުރާ މަސައްކަތުގައި އެޕާޓީއަށް ހުށަހަޅާ ފޯމުތަކުގެ ސައްހަކަން ބެލުމުގެ ގާބިލް ކަމެއް ޕާޓީގައި ނެތް ކަމަށް އެޕާޓީން ބުނެފިއެވެ.

ޕީއެންސީން މިފަދައިން ބުނެފައި މިވަނީ، އެޕާޓީ އަށް މެންބަރުން އިތުރު ކުރުމަށް ކުރާ މަސައްކަތުގެ ތެރެއިން ސައްހަ ނޫން ފޯމުތަކެއް އެޕާޓީން ހުށަހަޅާފައިވާ މައްސަލަތަކެއް ފެންމަތިވެފައިވާ ދަނޑިވަޅެއްގައެވެ. ވަގު ފޯމު ހުށަހަޅައިގެން ޕާޓީތަކަށް މެންބަރުން އިތުރު ކުރާ މައްސަލަ ބޮޑުވެފައި ވަނިކޮށް އިއްޔެ ފެންމަތިވީ ވައިކަރަދޫ ދާއިރާގެ މެންބަރު ފިއްޓޭ ޕީއެންސީއަށް ވައްދާފައިވާ މައްސަލައެވެ.

ޕީއެންސީން މިއަދު ނެރެފައިވާ ނޫސް ބަޔާނެއްގައި ބުނީ އެ ޕާޓީގެ އެކްޓިވިސްޓުންނާއި އަދި ހެޔޮއެދޭ ފަރާތްތަކުގެ ބައިވެރިވުމާ އެކު މެންބަރުން އިތުރު ކުރަން މުޅި ރާއްޖޭގައި ހިންގި "މެމްބަޝިޕް ޑްރައިވް" ގެ ތެރެއިން އެތައް ހާސް ފޯމެއް އިލެކްޝަން ކޮމިޝަނަށް ހުށަހަޅާފައިވާ ކަމަށެވެ. އެކަމަކު މަދުން ނަމަވެސް ސައްހަ ނޫން ފޯމްތަކެއް ހުށަހެޅިފައިވާކަން އެޕާޓީ އަށް ވެސް ފާހަގަކުރެވިފައިވާ ކަމަށް ޕީއެންސީން ބުންޏެވެ.

ޕީއެންސީގެ ބަޔާނުގައި އެޕާޓީ އަށް މެންބަރުން އިތުރު ކުރުމަށް ކުރިޔަށް ގެންދާ ހަރަކާތަކީ ރާއްޖޭގައި މިހާތަނަށް އެއްފަހަރާ އެހާ ގިނަ އަދަދަކަށް ސިޔާސީ ޕާޓީއަކަށް ވަނުމަށް ފޯމު ހުށަހެޅުމަށް ކުރިޔަށް ގެންދިޔަ ހަރަކާތްކަން ވެސް ވަނީ ފާހަގަކޮށްފައެވެ.

"ޕާޓީގެ އިދާރީ މުވައްޒަފުން ނުހަނު ބުރަކޮށް މަސައްކަތްކޮށް، ޕާޓީގެ އިލެކްޝަން ޕޯޓަލް މެދުވެރިކޮށް އެ ފޯމްތައް އަޕްލޯޑް ކުރަމުން ދިޔަ ނަމަވެސް، ޕާޓީ އަށް ލިބޭ ފޯމްތަަކުގެ ސައްހަކަން ކަށަވަރު ކުރުމުގެ ގާބިލުކަން ޕާޓީގައި ނެތުމުގެ ނަތީޖާ އަކީ ފޯމެއްގެ ސައްހަކަމާ މެދު ސުވާލު އުފެދޭ ހިސާބަކީ އީސީ އަށް ފޯމު ހުށަހެޅުމުގެ ފަހު މަރުހަލާ،" ޕީއެންސީން ބުންޏެވެ.

ޕީއެންސީގެ ނަމުގައި ސައްހަ ނޫން ފޯމުތަކެއް ހުށަހަޅާފައިވާ މައްސަލަ އެޕާޓީގެ ފަރާތުން ފުލުހުންނާއި އިލެކްޝަންސް ކޮމިޝަނަށް ހުށަހަޅާފައިވާ ކަމަށާއި އަދި އެ ދެ މުއައްސަސާ އިން އެ މައްސަލަ ބަލަމުން އަންނަ ކަމަށް ވެސް ޕީއެންސީގެ ބަޔާނުގައި ބުނެފައިވެއެވެ. އަދި އެކަމުގައި އެޕާޓީގެ ފަރާތުން ދޭން ޖެހޭ ފުރިހަމަ އެއްބާރުލުން ދޭނެ ކަމަށްވެސް އެޕާޓީން ބުންޏެވެ.

ޕީއެންސީން ބުނީ ސައްހަ ނޫން ފޯމްތައް ހުށަހަޅައިގެން ޕާޓީގެ މެންބަރުންގެ އަދަދު އިތުރުކޮށް ރައްޔިތުންގެ ހައްގެއް ގެއްލޭ ފަދަ އެއްވެސް ކަމެއް ކުރުމަކީ އެ ޕާޓީގެ ލީޑަޝިޕުން ބަލައިގަނެ، ހިތްވަރު ވެސް ދޭނެ ކަމެއް ނޫން ކަމަށް ވެސް އެޕާޓީން ބުންޏެވެ. އަދި ސައްހަ ނޫން ފޯމެއް މެދުވެރިކޮށް އެއްވެސް މީހަކު ޕާޓީ އަށް ވައްދާފައިވާ ނަމަ މި މެއިލް [email protected] މެދުވެރިކޮށް އެކަން ހިއްސާ ކުރުމުން އެކަން ހައްލުކޮށް ދޭނެ ކަމަށް ޕީއެންސީން ބުންޏެވެ.