ދިވެހިން އެދޭ ގޮތަށް ވެރިކަން ކޮށްދެއްވަމުން ގެންދަވަނީ ރައީސް ޑރ. މުހައްމަދު މުއިއްޒު ކަމަށް ފުނަދޫ ދާއިރާގެ މެންބަރު މުހައްމަދު މަމްދޫހް ވިދާޅުވެއްޖެއެވެ.

ދުވަސްތަކަކަށްފަހު ސަރުކާރު ހިންގާ ޕާޓީ ޕީއެންސީން މިރޭ އެޕާޓީގެ ހަރުގޭގައި ބޭއްވި ޖަލްސާގައި ވާހަކަދައްކަވަމުން މަމްދޫހް ވިދާޅުވީ 2018ވަނަ އަހަރު ރާއްޖޭގެ ވެރިކަމާއި ހަވާލުވެވަޑައިގެންނެވި ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުން އެންމެ ފުރަތަމަ ދުވަހުން ފެށިގެން މަސައްކަތް ކުރަމުން ދިޔައީ "ވައްކަން" ކުރަން ކަމަށެވެ. އަދި އެކަމަށް ހިތްވަރު ދެއްވީ އޭރު ރައީސުލްޖުމްހޫރިއްޔާގެ މަގާމުގައި ހުންނެވި އިބްރާހީމް މުހައްމަދު ސޯލިހު ކަމަށް މަމްދޫހު ތުހުމަތު ކުރެއްވިއެވެ.

އެމްޑީޕީ ސަރުކާރަށް ނަތީޖާތައް ހާސިލް ނުކުރެވުނު މައިގަނޑު ސަބަބަކީ ވެސް ވައްކަން ކުރަމުން ގެންދިއުން ކަމަށް މަމްދޫހު ވިދާޅުވިއެވެ. އެމްޑީޕީ ވެރިކަމުގެ ފަސް އަހަރު ދުވަހުގެ ވެރިކަން ނިމިގެން ދިޔައިރު 64 ބިލިއަން ރުފިޔާ އިން ދިވެހި ގައުމު ދަރުވާލާފައިވާ ކަމަށް މަމްދޫހް ވިދާޅުވިއެވެ. އެމްޑީޕީގެ ވެރިކަމުގެ ފަސް އަހަރުގެ ނިމުނުއިރު އަސާސީ ހިދުމަތްތައް ވެސް ލިބިފައި ނުވާ ކަމަށް އޭނާ ފާހަގަކުރެއްވިއެވެ.

ޕީއެންސީން މިރޭ ބޭއްވި ޖަލްސާގެ ތެރެއިން: ފޮޓޯ | ހަތާވީސް

"އެކަން ނުކުރެވި އޮތީ ވައްކަން ކުރަން ސަރުކާރުގެ އެންމެ މަތިން ފެށިގެން އެންމެ ތިރިއަށް ވެސް ދޮރުތައް ހުޅުވަމުން އެ މަގަށް ދިވެހި ރައްޔިތުންގެ މާލިއްޔަތު ލޫޓުވަމުން ދިޔައީމާ،" އޭނާ ވިދާޅުވިއެވެ.

ހެންވޭރު އުތުރު ދާއިރާގެ މެންބަރު އައިފާން ޕީއެންސީގެ މިރޭގެ ޖަލްސާގައި ވާހަކަދައްކަވަނީ: ފޮޓޯ | ހަތާވީސް

މިރޭގެ ޖަލްސާގައި ވާހަކަދައްކަވަމުން ހެންވޭރު އުތުރު ދާއިރާގެ މެންބަރު އައިފާން ވިދާޅުވީ އެމްޑީޕީ ސަރުކާރުގައި ހިނގާދިޔަ ވައްކަމާއި ކޮރަޕްޝަންގެ ވާހަކަތައް ކޮންމެ ދުވަހަކުވެސް ރައްޔިތުންނަށް ހަނދާން ކޮށްދޭން ޖެހޭ ކަމަށެވެ. އެއީ ހުއްޓާލައިގެން ނުވާނެ ވަރުގެ ވާހަކައެއް ކަމަށް އޭނާ ވިދާޅުވިއެވެ.

އެމްޑީޕީން ވެރިކަމާއި ހަވާލުވިއިރު ގައުމުގެ ރައުސުލްމާލުގައި ފައިސާ ހުރި ކަމަށާއި އެހެންނަމަވެސް ވެރިކަން ނިންމާލިއިރު އެއްވެސް މަސައްކަތެއް އެޕާޓީއަށް ކުރެވިފައި ނުވާ ކަމަށް އައިފާން ވިދާޅުވިއެވެ. އޭގެ ބަދަލުގައި އެމްޑީޕީން ވެރިކަން ނިންމާލިއިރު ދިޔައީ ދިވެހިގެ މުޅި މާލިއްޔަތު "ކާލައިގެން" ކަމަށް އައިފާން ވިދާޅުވިއެވެ.