މި ހިނގާ 20ވަނަ ރައްޔިތުން މަޖިލީހުގައި ސަރުކާރު ހިންގާ ޕީއެންސީ އަށް ނިސްބަތްވެވަޑައިގަންނަވާ 75 މެންބަރުން ތިއްބަވައެވެ. މަޖިލީހުގައި އޮތީ ޕީއެންސީގެ ސުޕަ މެޖޯރިޓީއެވެ. "ކުރީ ސަރުކާރު"ގެ ވާހަކަތައް ދައްކަން އޮވެއްޖެ ނަމަ އެ މެންބަރުން މަޖިލިސް ތަޅުމުގައާ ސޯޝަލް މީޑިއާގެ އެކި ޕްލެޓްފޯމްތަކުގައި "ފޯރީ"ގައި އެ ވާހަކަތައް ދައްކައެވެ.

ނަމަވެސް އިއްޔެ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ތެރޭގައި ހިނގާދިޔަ "ގޯތި ވައްކަން" ފަޅާއެރިއިރު، އެ ވާހަކަތައް ދައްކާލަން ސޯޝަލް މީޑިއާގައި ކެރުނީ މަދު މެންބަރަކަށެވެ. މަޖިލިސް ތަޅުމުގައި ކޮރަޕްޝަނާއި ފަސާދަ އާއި މިނޫންވެސް އެހެން ކުށްކުށުގެ ވާހަކަތަކުގެ ވާހަކަތައް އަޑަށް ބާރުލާފައި ދައްކަވާ މެންބަރުން "އެޗްޑީސީގެ ގޯތި ވައްކަމުގެ" ވާހަކަތައް ފެންމަތިވިއިރު ފެންނާކަށް ނެތެވެ.

އެ ވާހަކަތައް މިހާރުވެސް ދައްކަވަމުން ގެންދަވަނީ ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ހިނގާދިޔަ ކޮރަޕްޝަނުގެ ވާހަކަތައް އެންމެ ގަދައަށް ދެއްކެވި އޭރުގެ ނޫސްވެރިޔާ އަދި މިހާރު ހިތަދޫ މެދު ދާއިރާގެ މެންބަރު އަހްމަދު އަޒާނެވެ. ސޯޝަލް މީޑިއާގައި "އެޗްޑީސީގެ ގޯތި ވައްކަމުގެ" ވާހަކަތައް ތިލަވުމާއެކު އެކަން ބެލުމަށް އެންމެ ފުރަތަމަ ގޮވާލެއްވި މަޖިލިސް މެންބަރަކީ ވެސް އެއީއެވެ. އޭގެފަހުން ވެސް އޭނާ ވަނީ އެކަމާއި ގުޅިގެން އެތައް ވާހަކަތަކެއް ދައްކަވާފައެވެ.

"ބިންވެރިޔާ ސްކީމުން ގޯތި ލިބުނު ފަރާތްތައް ގެޒެޓުގައި ފެންނަން އެބަހުރި. އެ ލިސްޓުގައި ނެތް ފަރާތަކަށް ގޯއްޗެއް ލިބުނު ކަމުގެ އެއްބަސްވުމެއް ލިބިފައިވާނަމަ، އެ ވާނީ ހަދާފައި އޮތް ލިޔުމަކަށް. އެފަދަ ލިޔުމެއް އަސްލެއް ކަމަށް ދައްކައިގެން ދައުލަތުގެ އިދާރާތަކަށް ހުށަހެޅުމަކީ ޖިނާއީ ކުށެއް. މިއަދު އާންމުވެފައިވާ މައުލޫމާތުތަކަށް ބަލާއިރު އެމްޑަބްލިއުއެސްސީގެ ޑީއެމްޑީ ފަޒީލު ވަނީ މިފަދަ ސައްހަ ނޫން ލިޔުމެއް އެޗްޑީސީއަށް ހުށަހަޅާފަ. ފަޒީލަކީ ބިންވެރިޔާ ސްކީމުން ގޯތި ލިބުނު ފަރާތެއް ނޫން. ލިސްޓު ބަލާލީމަ އެކަން ސާފު. މިކަމުގައި އިތުރު ފަރާތްތަކެއްގެ ބައިވެރިވުން އޮތުންވެސް އެކަށީގެންވޭ. އުންމީދަކީ ފުލުހުން މި މައްސަލަ ވީހާވެސް އަވަހަކަށް ތަހުގީގުކޮށް ނިންމުން،" އަޒާން އެކްސްގައި ކުރެއްވި ޕޯސްޓެއްގައި ވިދާޅުވިއެވެ.

"އެޗްޑީސީގެ ގޯތި ވައްކަމުގެ" ދެކޮޅަށް ވާހަކަދެއްކެވިއިރު ވެސް އަޒާން ރައްޔިތުންނަށް ދެއްވި ޔަގީންކަމަކީ ރައީސް ޑރ. މުހައްމަދު މުއިއްޒުގެ ސަރުކާރުގައި ވައްކަމަށް ޖާގަ ނުދެއްވާނެ ކަމުގެ ޔަގީންކަމެވެ.

އަޒާންގެ އިތުރުން ހުޅުމާލެ އުތުރު ދާއިރާގެ މެންބަރު ހުސައިން ޝަރީފު "އެޗްޑީސީގެ ގޯތި ވައްކަމުގެ" ވާހަކަތައް މީޑިއާތަކުގެ ސުރުހީއަށް އެރުމުން، "މިއީ ތެދު މައުލޫމާތު ކަމަށްވަންޏާ، މިނިވަންކަމާއެކު މަސައްކަތް ކުރުމަށް ޤާއިމް ކޮށްފައިވާ މުއައްސަސާތަކުން ހަނުތިބެގެންނުވާނެ" ކަމަށް ވިދާޅުވެ އެކްސްގައި ޕޯސްޓެއް ކުރެއްވިއެވެ.

ނަމަވެސް 75 މެންބަރުންގެ ސުޕަ މެޖޯރިޓީ އޮތް ޕީއެންސީގެ ޕީޖީ ގްރޫޕްގެ ބައެއް އެހެން މެންބަރުން މިއަދުވެސް އުޅުއްވީ "ކުރީ ސަރުކާރު"ގެ ވާހަކަތައް ދެއްކުމުގައެވެ. އަދި ބައެއް އެހެން މެންބަރުން އަދިވެސް "ހަނު" ހުންނެވީއެވެ.

ވަގު ލިޔެކިޔުންތަކެއް ހުށަހަޅައިގެން، ހުޅުމާލެ ދެ ވަނަ ފިޔަވަހިން ހިލޭ ގޯތި ހޯދަން އުޅުނު މައްސަލަ ފެންމަތިވުމާ ގުޅިގެން، އެޗްޑީސީގެ ޗެއާމަން އަހުމަދު ނާސިފް ފިޔަވައި، އެ ބޯޑުގައި ހިމެނޭ 10 މެމްބަރުން މިހާރު ވަނީ ސަސްޕެންޑުކޮށްފައެވެ.

އާންމުވެފައިވާ އެޗްޑީސީގެ ލިޔެކިޔުންތަކުން އެނގޭ ގޮތުން ހުޅުމާލެ ދެ ވަނަ ފިޔަވަހިން ގޯތި ހޯދަން އުޅެފައި ވަނީ ބިންވެރިޔާ ސްކީމުގެ ދަށުން ގޯތި ލިބުނު ފަރާތްތަކުގެ އެއްބަސްވުންތައް ފޯޖުކޮށްގެންނެވެ. އަދި އެ ގޯތިތައް ދޫކުރުމަށް އެދި އެޗްޑީސީން ހައުސިން މިނިސްޓްރީއަށް އެދި ހުށަހެޅުމުން އެޗްޑީސީން އެދުނު ފަރާތްތަކަކީ ބިންވެރިޔާ ސްކީމުގެ ދަށުން ގޯތި ލިބިފައިވާ ފަރާތެއް ނޫންކަން އެނގިފައިވެއެވެ.

އެޗްޑީސީން ގޯތި ދޭން މަސައްކަތްކޮށްފައި ވަނީ ފަޒުލްގެ އެއްބަނޑުއެއްބަފާ ބޭބެ، އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލު ރަޝީދަށެވެ. އޭނާ ވެސް މިހާރު ހުންނެވީ ސަސްޕެންޑު ކޮށްފައެވެ. އަދި އޭނާގެ މައްޗަށް ތަހުގީގުވެސް އަންނަނީ ހިންގަމުންނެވެ.