މާދަމާ ފާހަގަ ކުރާ މަސްވެރިންގެ ދުވަހާ ދިމާކޮށް، މަސް ކިރާތާ 48 ގަޑިއިރު ތެރޭގައި މަސްދޯނިތަކަށް ފައިސާ ދޫކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ އއ. އަތޮޅާއި ކ. އަތޮޅުގެ ބައެއް ރަށްތަކަށް ކުރައްވާ ދަތުރުގައި މިއަދު ކ. ގާފަރަށް ވަދައިގެން އެ ރަށުގެ ރައްޔިތުންނާ ބައްދަލު ކުރައްވަމުންނެވެ.

"މަސް ކިރާތާ 48 ގަޑިއިރު ތެރޭގައި އެ ދޯނީގެ އެކައުންޓަށް ފައިސާ ޖަމާވަމުންދާނެ. އިރާދަކުރެއްވިއްޔާ. 48 ގަޑިއިރު ތެރޭގައި،" ރައީސް ވިދާޅުވިއެވެ.

"ދެން އެމްއައިބީ އެކައުންޓް ހުރި ފަރާތްތަކަށް ގޮތްތަކެއް ހޯދަންޖެހޭނެ. އެހެންވީމަ އެކަންތައް ހަމަޖެހިގެން އެދިޔައީ. މިކަމުގައި ބީއެމްއެލްގެ ފަރާތުން ދެއްވި އެއްބާރުލުން ވަރަށް ބޮޑަށް ފާހަގަ ކުރަން. ބޭންކް އޮފް މޯލްޑިވްސް ރައްޔިތުންގެ ބޭންކެއްކަން ހަގީގަތުގައި ހަގީގީ މާނައިގައި ސާބިތުކޮށްދެމުން އެ ވަޑައިގަންނަވަނީ،" ރައީސް ވިދާޅުވިއެވެ.

ރައީސް މުއިއްޒު ކ. ގާފަރަށް ވަޑައިގެން، އެރަށު ރައްޔިތުންނާ ބައްދަލުކުރައްވާ ވާހަކަދައްކަވަނީ: ފޮޓޯ | ރައީސް އޮފީސް

ރައީސް ވިދާޅުވީ މަސްވެރިންނަށް ދޭންޖެހޭ ފައިސާ ނުދެވި "ބެކްލޮގް" އެއް ދެން ނޯންނާނެ ކަމަށެވެ.

އެމަނިކުފާނު ވިދާޅުވީ ރިޔާސީ އިންތިހާބުގައި ވައުދުވެވަޑައިގެންނެވި ގޮތަށް މަސްކިރާތާ 48 ގަޑިއިރު ތެރޭގައި ފައިސާ ދޫކުރެވޭ ގޮތަށް ނިންމީ ފިނޭންސް މިނިސްޓްރީ އާއި ފިޝަރީޒް މިނިސްޓްރީގެ އިތުރުން ބޭންކް އޮފް މޯލްޑިވްސްއާ އެކު އިއްޔެ ވެނުނު އެއްބަސްވުމަކުން ކަމަށެވެ.

އެހެންކަމުން ރައީސް ވަނީ އެ އެއްބަސްވުމުގެ ދަށުން ކުރިއަށް އޮތް ތަނުގައި މަސްވެރިންނަށް ފައިސާ ނުދެވި ލަސްވެ، ބެކްލޮގެއް ނުއުފެދޭނެކަމުގެ ޔަގީންކަން ދެއްވައިފައެވެ.