އަލަށް ވަޒީފާ އިން ރިޓަޔާ ކުރާ މުވައްޒަފުންނަށް އަންނަ ޖެނުއަރީން ފެށިގެން މަހުން މަހަށް ދޭ އެލަވަންސެއް ނުދޭން ނިންމައިފިއެވެ.

ނޭޝަނަލް ޕޭ ކޮމިޝަނުން އިދާރާތަކަށް ފޮނުވާފައިވާ ސިޓީއެއްގައި ބުނީ، މަހުން މަހަށް ދޭ ފައިސާ ނުދިން ނަމަވެސް، އެއްފަހަރާ ދޭ ފައިސާ ލިބިގެން ދާނެ ކަމަށެވެ. މިގޮތަަށް ނިންމާފައި ވަނީ ސަރުކާރުގެ ރިފޯމް އެޖެންޑާގެ ދަށުން ހަރަދު ކުޑަކުރަން އަޅާ ފިޔަވަޅެއްގެ ގޮތުގައި ކަމަށް ވެސް ބުނެފައިވެއެވެ.

ނަމަވެސް ޑިސެމްބަރު މަހާއި ހަމައަށް ރިޓަޔާ ކުރާ ފަރާތްތަކަށް މަހުން މަހަށް ދޭ އެލަވަންސް އޮންނަ އުސޫލުން ލިބިގެން ދާނެ ކަމަށް ވެސް ބުނެފައިވެއެވެ.

މިގޮތަށް ބަދަލު ގެންނަން ނިންމާފައިވާއިރު އަންނަ އަހަރަށް ލަފާކޮށް ފާސްކޮށްފައިވާ ދައުލަތުގެ ބަޖެޓުގައި ބުނެފައި ވަނީ ދައުލަތުގެ ވަޒީފާއިން ރިޓަޔާކުރާ ފަރާތްތަކަށް މިދިޔަ އަހަރު 298 މިލިއަން ރުފިޔާ ހޭދަކޮށްފައިވާ ކަމަށާއި އެ އަދަދު އަންނަ އަހަރު 325.6 މިލިއަން ރުފިޔާ އަށް އިތުރުވާނެ ކަމަށެވެ.