ރައީސް ކަމަށް ކުރިމަތިލުމުގެ އެއްވެސް ވިސްނުމެއް ނެތް ކަމަށާއި އަދި 2028 ވަނަ އަހަރު ޕީއެންސީގެ ރިޔާސީ ޓިކެޓް ޕްރައިމަރީއަކާ ނުލައި ލިބިވަޑައިގަންނަވާނީ ރައީސް ޑރ. މުހައްމަދު މުއިއްޒުއަށް ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް މިރޭ ވިދާޅުވި އެވެ.

މިއަދު ބޭއްވި ޕީއެންސީގެ ޕާޓީގެ އެތެރޭގެ އިންތިހާބުތަކާ ގުޅިގެން ބޭއްވި ނޫސްވެރިންގެ ބައްދަލުވުމެއްގައި އަބްދުއްރަހީމް ވިދާޅުވީ ރާއްޖޭގެ ވެރިކަން ކުރުމުގެ އެއްވެސް ނިޔަތެއް ނެތް ކަމަށާއި އެ ފުރުސަތު ލިބުނަސް އެކަމުން ސަލާމަތްވާނެ ކަމަށް އެމަނިކުފާނު ވިދާޅުވި އެވެ.

"އެފަދަ ފުރުސަތެއް ލިބުނަސް އެކަމުން ސަލާމަތް ވާނަން،" އެމަނިކުފާނު ވިދާޅުވި އެވެ.

އޭނާ ވިދާޅުވީ ޕީއެންސީގެ އަސާސީ ގަވާއިދާ އޮތްގޮތުން 2028 ގެ ރިޔާސީ ޓިކެޓު ލިބިވަޑައިގަންނަވާނީ ރައީސް މުއިއްޒުއަށް ކަމަށެވެ. އަދި ރައީސް މުއިއްޒާއި ދެމެދު އެއްވެސް މައްސަލައެއް ނެތް ކަމަށް ވިދާޅުވެ, ރިޔާސީ ޓިކެޓް ރައީސް މުއިއްޒުއަށް ލިބިވަޑައިގަންނަވާނެ ކަމުގެ ޔަގީންކަން އޭނާ ދެއްވި އެވެ.

"އަސާސީ ގަވާއިދު ބުނަނީ ޕީއެންސީގެ ޓިކެޓުގައި ނިކުމެވަޑައިގެން ރާއްޖޭގެ ވެރިކަމަށް އަންނަވާ ބޭފުޅަކު އެ މަގާމުގަ ހުންނަވާ ދެވަނަ ދައުރަކަށް ކުރިމަތިލައްވަން ބޭނުންފުޅު ވަންޏާ ރިޔާސީ ޕްރައިމަރީ އަކާ ނުލާ އެ ޓިކެޓު އެ ބޭފުޅަކަށް ލިބިވަޑައިގަންނަވާނެ ކަމަށް،" އަބްދުއްރަހީމް ވިދާޅުވި އެވެ.

އަބްދުއްރަހީމް ވިދާޅުވީ އޭނާއާ ރައީސާއި ދެމެދު އެއްވެސް މައްސަލައެއް ނެތް ކަމަށާއި އަދި ވެރިކަން ފެށުނުއިރު އޮތް ގުޅުމަށް ވުރެ ގުޅުން ވަރުގަދަ ވެފައިވާ ކަމަށް އެމަނިކުފާނު ވިދާޅުވި އެވެ.