މެމްބަރަކު ސިޔާސީ ޕާޓީއަކުން ވަކިވެއްޖެނަމަ، ނުވަތަ ޕާޓީއަކުން ވަކިކޮށްފިނަމަ މަޖިލިސް މެމްބަރުކަމުގެ ގޮނޑި ގެއްލޭ ގޮތަށް ގާނޫނުއަސާސީއަށް ހުށަހެޅި އިސްލާހު މަޖިލީހަށް ބަލައިގަތުމަށް ނެގި ވޯޓުގައި ޕީއެންސީގެ ހަތް މެމްބަރަކު ބައިވެރިއެއް ނުވެއެވެ.

ގާނޫނުއަސާސީއަށް ފަސް އިސްލާހެއް ގެނައުމަށް ސަރުކާރުގެ ފަރާތުން، ހުޅުދޫ ދާއިރާގެ މެމްބަރު މުހައްމަދު ޝާހިދު ހުށަހެޅުއްވި ބިލު މަޖިލީހަށް މިއަދު ބަލައިގަތީ 69 މެމްބަރުންގެ ވޯޓުންނެވެ. އެ އިސްލާހު ބަލައިގަތުމާ ދެކޮޅަށް 12 މެމްބަރަކު ވޯޓު ދެއްވިއެވެ.

އެ އިސްލާހު މަޖިލީހަށް ބަލައިގަތުމަށް ނެގި ވޯޓުގައި އެމްޑީއޭގެ ލީޑަރު އަހުމަދު ސިޔާމް މުހައްމަދާއި ޖޭޕީގެ ލީޑަރު ގާސިމް އިބްރާހިމްގެ އިތުރުން، ޕީއެންސީގެ ހަތް މެމްބަރަކު ބައިވެރިއެއް ނުވެއެވެ. އަދި އެމްޑީޕީ މެމްބަރުންގެ ތެރެއިން، މާވަށު ދާއިރާގެ މެމްބަރު އަހުމަދު ޝާކިރު ވެސް އެ ބިލު ބަލައިގަތުމުގެ ވޯޓުގައި ބައިވެރިވެރިއެއްނުވެއެވެ.

ވޯޓުގައި ބައިވެރިނުވާ ޕީއެންސީ މެމްބަރުން:

  1. ދާންދޫ ދާއިރާގެ މެމްބަރު މުހައްމަދު ފަޒީލް
  2. ތުލުސްދޫ ދާއިރާގެ މެމްބަރު އިބްރާހިމް ނަސީމް
  3. ފުވައްމުލަކު އުތުރު ދާއިރާގެ މެމްބަރު ހަމަދު
  4. ހިތާދޫ ދާއިރާގެ މެމްބަރު މުހައްމަދު ސިރުހާން
  5. ނިލަންދޫ ދާއިރާގެ މެމްބަރު ފާތިމަތު ސައުދާ
  6. ތިނަދޫ ދެކުނު ދާއިރާގެ މެމްބަރު މުހައްމަދު އަލްސަން އަހްމަދު
  7. ދިއްދޫ ދާއިރާގެ މެމްބަރު އަބްދުއްލަތީފު މުހައްމަދު

އެ އިސްލާހު ބަލައިގަނެ، ދިރާސާ ކުރުމަށްޓަކާ ވަނީ މުޅި މަޖިލީހުގެ ކޮމެޓީއަށް ފޮނުވާފައެވެ. އެއަށްފަހު މިއަދުގެ ޖަލްސާ ވަނީ ނިންމާލާފައެވެ.

ގާނޫނުއަސާސީ އިސްލާހު ކުރެވޭނީ މަޖިލީހުގެ ޖުމްލަ މެމްބަރުންގެ ހަތަރުބައި ކުޅަ ތިން ބައި މެންބަރުންގެ އަގުލަބިއްޔަތުންނެވެ. އެހެންކަމުން ގާނުނުއަސާސީއަށް ހުށަހަޅާ އިސްލާހެއް ފާސްވާނީ 70 މެމްބަރުންގެ އަގުލަބިއްޔަތުންނެވެ.

އެ ބިލު ބަލައިގަތުމާ ދެކޮޅަށް ވޯޓު ދެއްވި މެމްބަރުން:

  1. ހުޅުމާލެ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު
  2. ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް (ކުޑޫ)
  3. ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް
  4. ހަނިމާދޫ ދާއިރާގެ މެންބަރު އަބްދުއްޣަފޫރު މޫސާ
  5. ވައިކަރަދޫ ދާއިރާގެ މެމްބަރު ހުސައިން ޒިޔާދު
  6. ކަނޑިތީމު ދާއިރާގެ މެމްބަރު އަމީން ފައިސަލް
  7. ކެންދޫ ދާއިރާގެ މެމްބަރު މައުރޫފް ޒާކިރު
  8. ތޮއްޑޫ ދާއިރާގެ މެމްބަރު ހުސައިން ސަމީރު
  9. ކެޔޮދޫ ދާއިރާގެ މެމްބަރު މުހައްމަދު ނިއުޝާދު
  10. މަރަދޫ ދާއިރާގެ މެމްބަރު އަހުމަދުދީދީ
  11. ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް
  12. އައްޑޫ މީދޫ ދާއިރާގެ މެންބަރު އަބްދުއްރަހްމާން

މަޖިލީހުގެ 93 މެމްބަރުންގެ ތެރެއިން ޕީއެންސީގެ 75 މެމްބަރުން ތިއްބަވައެވެ. އެމްޑީޕީ މެމްބަރުންގެ އަދަދަކީ 12 އެވެ. އަދި އަމިއްލަ މެމްބަރުންގެ ގޮތުގައި ދެ މެންބަރުން ތިއްބަވައެވެ. އަދި އެމްޑީއޭގެ ދެ މެންބަރުން މަޖިލީހުގައި ތިއްބަވައެވެ.