ކަނޑުއަޑީގެ ޓަނަލްއަކުން މާލެއިން ރަސްމާލެ ގުޅާލާނެ ކަމަށް ރައީސުލްޖުމްހުރިއްޔާ ޑރ. މުހައްމަދު މުއިއްޒު ވައުދުވެވަޑައިގެންނެވި ނަމަވެސް، އެއީ ދުނިޔޭގައި މިހާރު ހުރި ޓެކްނޮލޮޖީއެއް ނޫން ކަމަށް ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓަރު ޑރ. މުއްތަލިބު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ޕްރެސް ކޮންފަރެންސްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިނިސްޓަރު މުއްތަލިބު ވިދާޅުވީ މާލެއިން ރަސްމާލެ ޓަނަލްއަކުން ގުޅާލުމަކީ ރައީސްގެ ވިޝަންއެއްގެ ކަމަށާއި ދެން ކުރަން އޮތް ކަމަކީ އެ ވިޝަންއަށް މަސައްކަތް ކުރުން ކަމަށެވެ.

"...އެއީއަކީ މިހާރު ދުނިޔޭގައެއް ފެންނަން ހުރި ޓެކްނޮލޮޖީއެއް ނޫން. މިވަގުތު ދުނިޔޭގެ އެއްވެސް ތަނެއްގައި އޯޕަންސީގައި ހަދާފަ ހުރި ކަހަލަ އިންފްރާސްޓްރަކްޗާއެއްގެ ވާހަކައެއް ނޫން މި ދައްކަނީ،" އިނގިރޭސީވިލާތުން ޖިއޯ ޓެކްނިކަލް އިންޖިއަނިރިންގެ ދާއިރާއިން، ޑޮކްޓަރ އޮފް ފިލޯސަފީ (ޕީއެޗްޑީ) ޙާޞިލްކުރައްވާފައި މުއްތަލިބު ވިދާޅުވިއެވެ.

ތިބޭފުޅުންނަށް އެނގިވަޑައިގަންނަވާނެ އެމެރިކާއިން ހަނދަށް ދާން ވެސް ޖޯން އެފް ކެނެޑީ ވިޝަން ކުރެއްވީކީ އެއްވެސް ބަޔަކު ހަނދަށް ގޮސްގެނެއް ނޫން. އެހެންނޫންތޯ؟
ޑރ. މުއްޠަލިބް، މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ

ރައީސް ވައުދުވެވަޑައިގެންނެވި ވިޝަންއަކީ އާދަޔާ ހިލާފު ކަމެއް ކަމަށް ފާހަގަ ކުރައްވައި މުއްތަލިބު ވިދާޅުވީ އެފަދަ ކަމެއް ކުރައްވަން ވައުދުވެވަޑައިގެންނެވުމަކީ ލީޑަރެއްގެ ސިފައެއް ކަމަށާއި އެ ވިޝަންއަކީ ރާއްޖެއަށް ތަރައްގީ ބޭނުންވާތީ ކުރެއްވި ކަމެއް ކަމަށެވެ. ކަނޑުއަޑީގައި ޓަނަލް އެޅުމަކީ މުޅިން އާ ކަމަކަށްވާތީ، ވަގުތު ނަގާނެ ކަމެއް ކަމަށާއި މާލީ ގޮތުންނާއި ޓެކްނިކަލް ގޮތުން އެ ޕްރޮޖެކްޓަކީ ފީސިބަލް ކަމެއްތޯ ބަލަންޖެހޭ ކަމަށް މުއްތަލިބު ވިދާޅުވިއެވެ.

ރަސް މާލެ އާއި މާލެ ކަނޑު އަޑިން އަޅާ އަންޑާ ވޯޓާ ޓަނަލްއަކުން ގުޅާލާނެ ކަމަށް ރައީސް ވައުދުވެވަޑައިގެންނެވީ މަޖިލިސް އިންތިހާބު ކައިރިވެފައިވަނިކޮށް، މިއަހަރުގެ ޖެނުއަރީ 22 ގައެވެ.

ރައީސް ވިދާޅުވީ ކަނޑުއަޑީގެ އެ ޓަނަލްގައި ދުއްވާނީ ރޭލެއް ކަމަށާއި އެ ރޭލު ދަތުރުގައި ކަނޑުއަޑީގެ ރީތި މަންޒަރުތައް ފެންނާނެ ކަމަށެވެ.

"އެ މަސައްކަތް ކުރުމަށްޓަކައި އަޅުގަނޑުމެން މިހާރު ވާނީ އެކަމުގެ ގާބިލްކަން ހުރި ކުންފުނިތަކާ އެކީ ފީސިބިލިޓީ މަސައްކަތްތައް ފަށާފައި. މިއީ ޓޫރިޒަމްގެ ބޮޑު މަޝްރޫއުއެއް. މިއީ ރާއްޖޭގެ ޓޫރިސްޓުން އެތައް ގުނައަކަށް އިތުރުވެގެންދާނެ ކަމެއް. އަޅުގަނޑުމެން ކުރާނީ ދެކޮޅުޖެހޭ މަސައްކަތް،" މާލޭ މޭޔަރުކަމުގެ ބައި-އިލެކްޝަން އެމްޑީޕީން ކާމިޔާބުކޮށް، އާދަމް އާޒިމް މޭޔަރުގެ މަގާމުގެ ހުވާ ކުރެއްވި ރަސްމިއްޔާތުގައި ރައީސް ވިދާޅުވިއެވެ.