ދޫނިދޫ ޖަލުގައި ހުއްޓާ ދަންޖެހުމުން، ފަރުވާދެމުންދަނިކޮށް މަރުވި ށ. މިލަންދޫ، ހެޕީލޭންޑް، އާދަމް އަތުހަރު، 32،ގެ ޕޯސްޓްމޯޓަމް ހަދަން އާއިލާއިން ދެކޮޅުހެދި ނަމަވެސް، އެކަން ކުރައްވާނެ ކަމަށް ހޯމްލޭންޑް، ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހްސާން މިރޭ ވިދާޅުވެއްޖެއެވެ.

މިނިސްޓަރު އިހްސާން އެހެން ވިދާޅުވީ އަތުހަރު ދަންޖެހުނު ވީޑިއޯ ނޫސްވެރިންނަށް ދައްކާލުމަށްފަހު، އިސްކަންދަރު ބިލްޑިންގައި ނޫސްވެރިންނާ ވާހަކަ ދައްކަވަމުންނެވެ. އެ ބައްދަލުވުމުގައި ދެއްކި ވާހަކަތަކުގެ ތެރެއިން، "އޮންރެކޯޑު"ގައި މިނިސްޓަރު ވިދާޅުވީ އެ ވާހަކަ އެކަންޏެވެ.

އަތުހަރު ދަންޖެހުނު ވީޑިއޯ އޭނާގެ އާއިލާއަށާއި ނޫސްވެރިންނަށް މިރޭ ދައްކާފައިވެއެވެ. ވީޑިއޯއިން ފެންނަ ގޮތުން އަތުހަރު ދަންޖެހެން މަސައްކަތް ކުރީ އާދީއްތަ ދުވަހުގެ އިރުއޮއްސި 6:32 އެހާކަންހާއިރުއެވެ. ދަންޖެހުނުތާ 30 މެނިޓް ފަހުން 7:02ގައި ތިން ފުލުހަކު ގޮޅިއަށް ވަދެ، އޭނާގެ ކަރުގައި އޮތް ވާގަނޑު ކަނޑާލައި ބިންމަތީގައި ބާއްވާތަން ފެނެއެވެ. ނަމަވެސް ބިންމަތީގައި ބާއްވާފައި އޮތްއިރު، ސީޕީއާރެއް ނުދެއެވެ. ސްޓްރެޗާގައި އޭނާގެ ހަށިގަނޑު ގޮޅިން ނެރެގެން ގެންދިޔައީ 7:05 އެހާކަންހާއިރުއެވެ.

އަންހެނަކު ރަހީނު ކުރި މައްސަލާގައި ޝަރީއަތް ނިމެންދެން އަތުހަރު ބަންދުކުރީ އޭނާ ކޯޓަށް ހާޒިރުކުރުމެއް ނެތިއެވެ. އާއިލާއިން ބުނެފައި ވަނީ އޭނާއަށް ވަކީލަކު އައްޔަން ކުރުމުގެ ފުރުސަތު ވެސް ފުލުހުން ދީފައިނުވާ ކަމަށެވެ.

ފުލުހުންގެ ބަންދުގައި ހުއްޓާ އަތުހަރު ދަންޖެހުނު މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އާއި ނެޝަނަލް އިންޓަގްރިޓީ ކޮމިޝަން (އެންއައިސީ)އިން ދަނީ ތަހުގީގު ކުރަމުންނެވެ.