ރައްޔިތުންނަށް ބުރަ ނުވާ ގޮތަށް ކަންކަން ބައްޓަން ކުރުމަކީ ސަރުކާރުގެ ވިސްނުން ކަމަށާއި އެހެންކަމުން ޖީއެސްޓީ އާއި ޓީޖީއެސްޓީގެ އިތުރުން ބީޕީޓީ ފަދަ ޓެކްސްތައް ބޮޑު ކުރުމުގެ ވިސްނުމެއް ސަރުކާރުގެ ނެތް ކަމަށް ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވެއްޖެއެވެ.

ރައްޔިތުން މަޖިލީހުގެ މާލިއްޔަތު ކޮމެޓީގެ މިއަދުގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ 2023ވަނަ އަހަރުގެ ޖެނުއަރީ މަހުން ފެށިގެން ޓެކްސް ރޭޓުތަކެއް ބޮޑު ކުރެވިފައިވާ ކަމަށެވެ. ޓެކްސްތައް ބޮޑު ނުކުރި ނަމަވެސް ދައުލަތަށް ލިބެން ޖެހޭ އާމްދަނީ އިތުރު ކުރުމަކީ ސަރުކާރުގެ ވިސްނުން ކަމަށް އޭނާ ފާހަގަކުރެއްވިއެވެ.

މިނިސްޓަރު ވިދާޅުވީ ބައެއް ކަހަލަ ފީތައް ބޮޑު ކުރުމުގެ ބޭނުމަކީ 2026ވަނަ އަހަރަށް ހަމަވާ ދަރަނިތަކެއް ހުރުމުން ކަމަށާއި އެ ދަރަނިތައް ދައްކަން ޖެހެނީ ޑޮލަރުން ކަމަށެވެ.

"އެހެންވީމާ އެއަށް ބޭނުންވާ ބަފަރއެއް ސޮވަރިން ޑިވެލޮޕްމަންޓް ފަންޑު ބިލްޑު ކުރެވޭ ގޮތަށް އެ އަމާޒުގައި މަސައްކަތް ކުރުމަކީ ހަމަ ކޮންމެ ދިވެހި ރައްޔިތަކުވެސް ބޭނުންވާނެ ކަމެއް. އެކަންކަން ހާސިލް ކުރެވެން އަންނަނީ އޭގެ އެންމެ މުހިއްމު ކަމަކީ ސޮވަރިން ޑިވެލޮޕްމަންޓް ފަންޑަށް ޖަމާކުރެވޭ އަދަދު އިތުރު ކުރެވިގެން،" މިނިސްޓަރު ވިދާޅުވިއެވެ.

ދަރަނިތަކުގެ އިތުރަށް ވެސް އެހެން ބައެއް ކަންކަމަށް ބޮޑު ހޭދައެއް ކުރަން ޖެހޭކަން އެމަނިކުފާނު ފާހަގަކުރެއްވިއެވެ. މިސާލެއް ދައްކަވަމުން ވިދާޅުވީ ތެލަށް ކުރަން ޖެހޭ ހޭދަ ވަރަށް ބޮޑު ކަމަށެވެ. އެގޮތުން މިހާރުވެސް އެވްރެޖުކޮށް ހަފްތާއަކު 100 މިލިއަން ރުފިޔާ ތެލަށް ފައިސާ ދެއްކުމަށް ހޯދަން ޖެހޭ ކަމަށާއި އެއީ ވެސް ޑޮލަރުން ހަދަން ޖެހޭ ޕޭމަންޓެއް ކަމަށް ވިދާޅުވިއެވެ.

ހަމައެއާއެކު ސިއްހީ ކަންކަން ފަދަ އެނޫންވެސް ބައެއް ކަންކަމުގައި ބޭރު ފައިސާ އިން ގިނަ ޕޭމަންޓުތަކެއް ދައްކަންޖެހޭ ކަމަށް މިނިސްޓަރު ފާހަގަކުރެއްވިއެވެ. އެފައިސާތައް ހޯދޭނެ ގޮތްތަކެއް ކަނޑައެޅުމަކީ މުހިއްމު ކަމެއް ކަމަށް ވެސް ވިދާޅުވިއެވެ.