ޖަލު ބަލަހައްޓާ 18 އޮފިސަރެއްގެ އެކައުންޓުން ރިޝްވަތުގެ ގޮތުގައި ލިބުނު، 73.6 މިލިއަން ރުފިޔާ ފެނިފައިވާ ކަމަށް ފުލުހުން ބުނެފިއެވެ.

ތަހުގީގުން އެނގުނު ގޮތުގައި އެ ފައިސާ ފެނިފައި ވަނީ މޯލްޑިވްސް ކަރެކްޝަނަލް ސާވިސް (އެމްސީއެސް)ގެ ޖޫނިއާ އޮފިސަރުންތަކެއްގެ އެކައުންޓުންނެވެ. އެ މީހުން ހައްޔަރުކޮށް ތަހުގީގު ފަށާފައިވާ ކަމަށް ފުލުހުން މިރޭ ބުންޏެވެ.

މި މައްސަލައާ ގުޅޭ ގޮތުން އިސްކަންދަރު ބިލްޑިންގައި މިރޭ ބޭއްވި ޕްރެސް ކޮންފަރެންސެއްގައި ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާނު ވިދާޅުވީ މަސްތުވާތަކެއްޗާއި ފޯނު ޖަލަށް ވެއްދުމުގެ ތަހުގީގުގެ ތެރެއިން، 73.6 މިލިއަން ރުފިޔާ ފެނުނު 18 އޮފިސަރުންގެ ތެރެއިން ހަ މީހަކު ޖަލު އޮފިސަރުންގެ މަގާމުން ވަކިވެފައިވާ ކަމަށެވެ. އެ މީހުންގެ ތެރެއިން އެކެއްގެ އެކައުންޓުން 24 މިލިއަން ރުފިޔާ ފެނިފައިވާ ކަމަށް ވެސް އިހްސާން ވިދާޅުވިއެވެ.

ޖަލު އޮފިސަރުންގެ އެކައުންޓަށް ފައިސާ ދައުރުވެފައި ވަނީ ގައިދީންގެ އެކައުންޓުތަކުންނާއި ކުށުގެ މާހައުލުގައި ހަރަކާތްތެރިވާ މީހުންގެ އެކައުންޓުންނެވެ. މި މީހުންގެ އެކައުންޓަށް 73.6 މިލިއަން ރުފިޔާ ވަދެފައި ވަނީ މިދިޔަ އަހަރުގެ ޖެނުއަރީން ފެށިގެން މި މަހުގެ ނިޔަލަށެވެ.

"މި ފަރާތްތަކަކީ މިހާތަނަށް އަޅުގަނޑުމެން ބެލި ބެލުމުން ވިޔަފާރީގައި ރަސްމީ ގޮތުން ބައިވެރިވާ ފަރާތްތަކެއް ނޫން. އަދި އިތުރު ވަޒީފާއެއް އަދާކުރެވޭ ފަރާތެއް ނޫން،" އިހްސާން ވިދާޅުވިއެވެ.

މިނިސްޓަރު ވިދާޅުވީ ޔުނިފޯމް އަޅައިގެން، ދައުލަތުގެ އިތުބާރު ލިބިފައިވާ މަގާމުތަކެއްގައި ތިބި ބަޔަކަށް ރިޝްވަތު ދިނުމަށް ފައިސާ ހުށަހެޅި މީހުންނާއި ފައިސާ ހިފި މީހުންގެ މައްސަލަ ވެސް ބަލައި ތަހުގީގު ކުރައްވާނެ ކަމާށެވެ.

ޖަލު އޮފިސަރުންގެ ރިޝްވަތުގެ މައްސަލައާ ގުޅޭ ޕްރެސް ކޮންފަރެންސް މިނިސްޓަރު ދެއްވަމުން ގެންދަވިއިރު، ޖަލުގައި ގެންދިޔައީ އެ މައްސަލައިގެ ތަހުގީގު ކުރަމުންނެވެ.