އީރާނުގެ ރައީސް އިބްރާހިމް ރައީސީ ގޮވައިގެން ދަތުރުކުރި ހެލިކޮޕްޓަރުތަކުގެ ތެރެއިން ހެލިކޮޕްޓަރެއް ވެއްޓިއްޖެއެވެ. ވެއްޓުނު ހެލިކޮޕްޓަރުގައި ރައީސީ އިންނެވިކަމެއް އަދި ސާފެއް ނުވެއެވެ.

އީރާނުގެ ދާހިލީ ވަޒީރާ ހަވާލާދީ ރޮއިޓާސް އިން ރިޕޯޓު ކޮށްފައިވާ ގޮތުގައި ހާދިސާ ހިނގި ސަރަހައްދަށް ރެސްކިއު ޓީމުތައް ދަނީ މިހާރު ދަތުރު ކުރަމުންނެވެ.

އީރާނުގެ ރަސްމީ ނޫސް އެޖެންސީ އިރްނާއިން ބުނީ ރައީސީއާއެކު އެ ދަތުރުގައި އެގައުމުގެ ފޮރިން މިނިސްޓަރާއި އެގައުމުގެ އޮފިޝަލުން ވެސް ދަތުރުކުރަމުން ދިޔަ ކަމަށެވެ.

އީރާނުގެ ދައުލަތުގެ މީޑިއާއިން ބުނީ މި ހާދިސާ ހިނގާފައިވަނީ އީރާނުގެ އިރުމަތީ އަޒަރުބައިޖާން ޕްރޮވިންސްގެ ޖޮލްފާ ކައިރީގައި ކަމަށެވެ.

ސެމީ އޮފިޝަލް ތަސްނީމް ނިއުސް ވެބްސައިޓްގައި ވާގޮތުން ހެލިކޮޕްޓަރުތެރޭގައި ރައީސާއެކު ތިއްބެވި މީހުން ވަނީ ކުއްލި ކޯލެއް ކޮށްފައިވާ ކަމަށެވެ.