ފުލުހުންގެ މުސާރަ އަންނަ މާޗު މަހުގެ 1ވަނަ ދުވަހުން ފެށިގެން ބޮޑުވާނެ ކަމަށް ފިނޭންސް މިނިސްޓްރީން ފުލުހުންނަށް އަންގާފައިވާ ކަމަށް އޮފީސް އޮފް ދަ ކޮމިޝަނާގެ ހެޑް ޗީފް ސުޕްރިޓެންޑެންޓް އޮފް ޕޮލިސް މުހައްމަދު ޝިފާން ވިދާޅުވެއްޖެއެވެ.

ބައެއް މީޑިއާތަކުގައި ވަނީ ފުލުހުންނާއި ސިފައިންގެ މުސާރަތައް ބޮޑު ކުރަން ކުރިން ނިންމާފައި އޮތް ނިންމުން ފަސް ކޮށްފައިވާ ކަމަށް ރިޕޯޓު ކޮށްފައެވެ. ނަމަވެސް ޝިފާން ވަނީ އެކަމަށް ރައްދު ދެއްވައިފައެވެ.

އެކްސްގައި އޭނާ ކުރެއްވި ޕޯސްޓެއްގައި މިރޭ ވިދާޅުވީ މާޗު މަހުގެ 1ވަނަ ދުވަހުން ފެށިގެން ބޮޑުވާނެ ކަމަށް ފިނޭންސް މިނިސްޓްރީން ފުލުހުންނަށް އަންގާފައިވާ ކަމަށެވެ.

ޖެނުއަރީ މަހުން ފެށިގެން ފުލުހުންނާއި ސިފައިންގެ މުސާރަތައް ބޮޑު ކުރުމަށްޓަކައި ޕޭ ކޮމިޝަނުން ފުލުހުންނާއި ސިފައިންގެ އިދާރާތަކަށް އައު އޮނިޑަނޑު ވަނީ ފޮނުވައިފައެވެ. ޕޭ ކޮމިޝަނުން އޭރު ފޮނުވާފައިވާ އޮނިގަނޑަކީ ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ވީ ވައުދާ އެއްގޮތަށް ފޮނުވި އޮނިގަނޑެކެވެ.

ރިޔާސީ ކެމްޕެއިންގެ ތެރޭގައި ރައީސް ޑރ. މުހައްމަދު މުއިއްޒު ވެސް ވަނީ ފުލުހުންނާއި ސިފައިންގެ މުސާރަތައް ބޮޑު ކުރަން ނިންމައި އެކަން އިއުލާން ކުރައްވާފައެވެ. އެމަނިކުފާނު އިއުލާން ކުރެއްވީ ފުލުހުންނާއި ސިފައިންގެ މުސާރަ ދެގުނަ ބޮޑު ކުރައްވާނެ ކަމަށެވެ.

މި އަހަރަށް ލަފާކޮށް ކުރީ ސަރުކާރުން ހުށަހަޅާ މަޖިލީހުން ފާސްކޮށްފައިވާ ބަޖެޓުގައި އެކި ދާއިރާތަކުގެ މުސާރަތައް ބޮޑު ކުރުމަށް 500 މިލިއަނެއްހާ ރުފިޔާ ވަނީ ހިމަނައިފައެވެ.