ރާއްޖޭގައި އޮންނަން ފެންނަ ވެރިކަމުގެ ނިޒާމާ ގުޅޭ ގޮތުން ހިޔާލު ހޯދުމުގެ ވޯޓެއް ނެގުމަށް ގޮވާލައި، ދަ ޑިމޮކްރެޓްސް އިން މަޖިލީހަށް ހުށަހަޅާފައިވާ ގަރާރު މަޖިލީހުން މިއަދު ފާސްކޮށްފިއެވެ.

މަޖިލީހުން އެ ގަރާރު ފާސްކުރީ އެމްޑީޕީ އާއި ޑިމޮކްރެޓްސްގެ މެމްބަރުންގެ ތާއިދާ އެކު، 35 މެމްބަރުންގެ ވޯޓުންނެވެ.

މަޖިލީހުން އެ ގަރާރު ފާސްކޮށް، ނިޒާމީ ވޯޓު ނެގުމަށް އިލެކްޝަންސް ކޮމިޝަން (އީސީ)ގައި މަޖިލީހުން ދެންނެވުމަށް ގަރާރަށް ވަނީ ބަދަލު ގެނެސްފައެވެ. އެ އިސްލާހު ގެނައީ ގަރާރު ހުށަހެޅުއްވި ހުޅުދޫ ދާއިރާގެ މެންބަރު އިލްޔާސް ލަބީހު ހުށަހަޅުއްވައި، ގަލޮޅު ދެކުނު ދާއިރާގެ މެމްބަރު އީވާ ތާއިދު ކުރައްވައިގެންނެވެ.

"...ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 70 ވަނަ މާއްދާގެ (ށ)ގައި 6 ވަނަ ނަންބަރުގެ ދަށުން 30 އޮކްޓޫބަރު 2023ގެ ކުރިން ދިވެހިރާއްޖޭގައި އޮންނަން ފެންނަ ވެރިކަމުގެ ނިޒާމާ ގުޅޭ ގޮތުން ރައްޔިތުންގެ ހިޔާލު ހޯދުމުގެ އާންމު ވޯޓު ނެގުމަށް މި މަޖިލީހުން ނިންމައި، އެ ވޯޓު ނެގުމާ ބެހޭ ގޮތުން ހަމަޖައްސަންޖެހޭ އެންމެހާ އިމްތިޒާމުތައް ހަމަޖައްސައި ދެއްވުމަށް އިލެކްޝަންސް ކޮމިޝަންގައި ދެންނެވުމަށް ރައްޔިތުންގެ މަޖިލީހުން އިގުރާރުވަމެވެ." ގަރާރަށް ގެނެސްފައިވާ އިސްލާހުގައިވެއެވެ.

ނިޒާމީ ވޯޓު ނެގުމަށް މަޖިލީހުގައި ނެގި ވޯޓުގެ ނަތީޖާ: ދެކޮޅަށް އެއްވެސް މެމްބަރަކު ވޯޓެއް ނުދެއްވާ

ފެހި ގާނޫނުއަސާސީ އެކުލަވާލި ރައްޔިތުންގެ ހާއްސަ މަޖިލީހުން އެދިގެން، އޮގަސްޓް 18، 2007 ވަނަ އަހަރުއޮގަސްޓް 18، 2007،ގައި ރާއްޖޭގައި ނިޒާމެއް ވޯޓެއް ނެގިއެވެ. އެ ވޯޓުގައި 62.05 ޕަސެންޓުން މީހުން ވޯޓު ދިނީ ރާއްޖޭގައި އޮންނަން ފެންނަނީ ރިޔާސީ ނިޒާމެއް ކަމަށެވެ. އެގޮތަށް ވޯޓު ދިން މީހުންގެ ޖުމްލަ އަދަދަކީ 95,619 މީހުންނެވެ. ބަރުލަމާނީއަށް ތާއިދުކޮށް ވޯޓު ދެއްވީ 58،504 މީހުންނެވެ. އެއީ ވޯޓުލީ މީހުންގެ 37.95 ޕަސެންޓް ވޯޓެވެ.

ނިޒާމީ ވޯޓު ނެގުމަށް އެއްބަސްވެވަޑައިގަންނަވާކަން ރައީސް ވަނީ ހާމަކުރައްވާފައެވެ. ރައީސް ވިދާޅުވީ މަޖިލީހުން ފާސްކޮށް، އެމަނިކުފާނަށް އެ ގަރާރު ފޮނުވުމުން އެކަން އީސީ އަށް ހުށަހަޅުއްވާނެ ކަމަށެވެ. އަދި ނިޒާމީ ވޯޓު ނަގާނީ މި ހިނގާ ރިޔާސީ ދައުރު، ނޮވެމްބަރު 17ގައި ހަމަވުމުގެ ކުރިންނެވެ.

ނިޒާމީ ވޯޓު ނެގުމުގެ ގަރާރު މަޖިލީހަށް އިއްޔެ ހުށަހަޅުއްވަމުން އިލްޔާސް ވިދާޅުވީ ނިޒާމީ ވޯޓު އަލުން ނަގަންޖެހޭ ސަބަބުތަކެއް މިހާރު އެބަހުރި ކަމަށެވެ.

ނިޒާމީ ވޯޓު އަލުން ނަގަން ގަރާރު ހުށަހެޅި ސަބަބު:

  • ކޯލިޝަނަކާ ނުލައި ރިޔާސީ އިންތިހާބު ކާމިޔާބުކުރެވިފައިނުވުން
  • ވަކި ހިސާބަކުން ކޯލިޝަން ރޫޅި ތަރައްގީއަށް ހުރަސްއެޅުން
  • ވެރިކަމުގައި ސިޔާސީ މީހުން ބަންދުގައި ތިބެން ޖެހުން
  • ސިޔާސަތަށް ވޯޓުދިނުމުގެ ބަދަލުގައި، ވެރިކަން ބަދަލުކުރަން ވޯޓު ދިނުމުގެ ސަގާފަތް އޮތުން