ސިޔާސީ ވާދަވެރިންނަށް ރައްދު ދިނުމުގެ ގޮތުން ވެސް އެހެން ފަރާތްތަކުން ވެއްޓޭ ފަދަ، ދަށު ދަރަޖައަށް ވެއްޓިގެން ނުވާނެ ކަމަށް އިދިކޮޅު ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.

މުއިއްޒު މިފަދައިން ވިދާޅުވިއިރު އެމްޑީޕީގެ ރިޔާސީ ކެންޑިޑޭޓު އަދި ރައީސް އިބްރާހީމް މުހައްމަދު ސޯލިހްގެ އަނބިކަނބަލުން ފަޒްނާ އަހްމަދު ރިޔާސީ ކެމްޕެއިންގެ ޑޯޓުޑޯ އަށް މިއަދު ހަވީރު ހުޅުމާލެ ފޭސް ދޭކަށް ވަޑައިގަތުމުން އިދިކޮޅު ޕީޕީއެމް/ޕީއެންސީ އަށް ނިސްބަތްވާ ބައެއް ފަރާތްތަކުން ވަނީ ފުރައްސާރަ ކޮށްފައެވެ.

ފަޒްނާގެ އަރިހުގައި އެވަގުތު ހުޅުމާލެ ދާއިރާގެ މަޖިލިސް މެންބަރު އަލީ ނިޔާޒު ހުންނެވިއެވެ. ފޭސްބުކްގައި ފަޒްނާ އާއްމު ކުރެއްވި ލިޔުމެއްގައި ވަނީ އެކަމަނާ އަށް ކުރި ފުރައްސާރައާ ގުޅިގެން އިދިކޮޅު ކެންޑިޑޭޓަށް އަލީ ނިޔާޒު ފޯނު ކުރެއްވި ކަމަށާއި ނަމަވެސް ފޯނަށް މުއިއްޒު ޖަވާބު ދެއްވާފައި ނުވާ ކަމަށް ވިދާޅުވެފައެވެ. އަދި މެސެޖު ކުރެއްވުމުން މެސެޖަށް ވެސް ޖަވާބު ދެއްވާފައި ނުވާ ކަމަށް ވިދާޅުވިއެވެ.

ށ. ފުނަދޫގައި ބޭއްވި ޖަލްސާގައި މުއިއްޒު ވާހަކަދައްކަވަނީ: ފޮޓޯ | ޕީޕީއެމް

ސީދާ ފަޒްނާ އަށް ކުރި ފުރައްސާރައިގެ ވާހަކަ ވިދާޅުނުވެ، ށ. ފުނަދޫގައި ބޭއްވި ކެމްޕެއިން ޖަލްސާއެއްގައި މިރޭ މުއިއްޒު ވަނީ ސިޔާސީ ވާދަވެރިންނަށް ރައްދު ދޭން ވާނީ ރީތިކޮށް ކަމަށް ވިދާޅުވެފައެވެ.

"ވާން ޖެހޭނެ އަމަލާއި ބަހުން ރީތި މިސާލު ދައްކާ ބަޔަކަށް. ސިޔާސީ ވާދަވެރިޔާ އަށް ރައްދު ދިނުމުގެ ގޮތުން އެ ފަރާތުން ވެއްޓުނު ދަރަޖަ އަށް ވެއްޓިގެން ނުވާނެ،" މުއިއްޒު ވިދާޅުވިއެވެ.

ށ. ފުނަދޫގައި ބޭއްވި ޖަލްސާގައި މުއިއްޒު ބައިވެރިވެވަޑައިގަންނަވަނީ: ފޮޓޯ | ޕީޕީއެމް

މުއިއްޒުގެ ވާހަކަފުޅުގައި ވަނީ އިދިކޮޅު ޕީޕީއެމް/ޕީއެންސީގެ މެންބަރުން ވާން ޖެހޭނީ ރީތި ހަމަތަކުގެ މަތިން އުޅޭ ބަޔަކަށް ކަމަށް ވިދާޅުވިއެވެ. ދިވެހި މުޖުތަމައުން އެފަދަ ކަންކަން މިއަދު ނެތި ގޮސްފައިވާ ކަމަށާއި އެމަނިކުފާނުގެ ސަރުކާރެއްގައި އެކަންކަން އަނބުރާ ގެނައުމަށް މަސައްކަތް ކުރައްވާނެ ކަމަށް މުއިއްޒު ވިދާޅުވިއެވެ.

"ތައުލީމީ ނިޒާމުގެ ތެރެއިން އެ އާދަތައް އަނބުރާ ގެނެސްދޭން ހާއްސަ ސަމާލުކަމެއް ދޭނަން،" މުއިއްޒު ވިދާޅުވިއެވެ.

މުއިއްޒު މިފަދައިން ވިދާޅުވިއިރު ފަޒްނާ އަށް ފުރައްސާރަ ކުރި މައްސަލާގައި އިދިކޮޅު ފަރާތްތަކަށް ސޯޝަލް މީޑިއާގައި އަންނަނީ ފާޑު ކިޔަމުންނެވެ.