މިދިޔަ ހޯމަ ދުވަހުގެ ފަތިހު ތުރުކީ އާއި ސީރިއާގެ ސިޓީތަކަށް އައި ބިންހެލުމާއި އާފްޓާ ޝޮކްތަކުގެ ސަބަބުން އެތައް ހާސް ބަޔަކު ވަނީ މަރުވެފައެވެ. ބިން ހެލުމަށް 100 ގަޑިއިރަށް ވުރެ ގިނައިރުވީއިރުވެސް ސަލާމަތްކުރާ ފަރާތްތަކުން ދަނީ މީހުން ހޯދުމުގެ މަސައްކަތް ކުރަމުންނެވެ.

ބާރުމިނުގައި 7.8 އާއި 7.6 މެގްނިޓިއުޑްގައި އައި ބިންހެލުމާ ގުޅިގެން ތުރުކީގެ ބައެއް ސަރަހައްދުތައް ވަނީ ކުނިގޮނޑަކަށް ބަދަލުވެފައެވެ. ސަބަބަކީ އުސް އިމާރާތްތަކެއް ބިމާހަމަވުމުން، ފުނިފުންޏަށް ކުނި ޖަމާކޮށްފައި ހުރިހެން ސިފަވެއެވެ. އެގޮތުން ތުރުކީގެ ކަހްރާމަންމާރަސްގެ ސިޓީގައި މީހުން ދިރިއުޅޭ އިމާރާތްތަކާއި އޮފީސްތަކާއި ބޭންކުތަކާއި މާރުކޭޓުތައް ކުނިގަނޑަކަށް ބަދަލުވެފައެވެ. ސާޗް އެންޑް ރެސްކިއު ޓީމްތައް ދަނީ "ކުނީގެ ފަރުބަދަތައް" މަތީގައި މީހުން ހޯދުމުގެ މަސައްކަތް ކުރަމުންނެވެ.

ޖަމިއްޔާތަކަކާއި ވޮލަންޓިއަރުންގެ މެދުނުކެނޑި ގެންދަނީ ހަރަކާތްތެރިވަމުންނެވެ. މީހުން ހޯދުމާއި މީހުން ސަލާމަތްކުރުމާއި ރިލީފް ކުރުމުގެ މަސައްކަތްތަކަށް އެހީތެރިކަން ފޯރުކޮށްދެމުންނެވެ. މި މަސައްކަތުގެ ބޮޑުމިނަށް ބަލާއިރު، ސަލާމަތްވި މީހުން ހޯދުމުގައި އެހީތެރިވުމަށް ބައިނަލްއަގުވާމީ ޓީމުތައް ވެސް ދަނީ ހަރަކާތްތެރިވަމުންނެވެ.

https://twitter.com/Doranimated/status/1623473701051064321

މަރުވި މީހުންގެ އަދަދު 21،500 އަށް ވުރެ މައްޗަށް އަރާފައިވާއިރު، ފިނިހޫނުމިން ގަދަވެ، ހަލާކުވެފައިވާ ފަރުބަދަތަކުގެ ތެރޭގައި އިތުރު އެތައް ބަޔަކު ދިރިތިބޭނެ ކަމުގެ އުއްމީދު ދަނީ ކުޑަވަމުންނެވެ. ނޫސްވެރިން ގެންދަނީ ސަލާމާތްވާ މީހުންގެ ވާހަކަތައް ރިޕޯޓްކުރަމުންނެވެ. މުޅި ބިންހެލުމުގައި ސީރިއާ އާއި ތުރުކީން މަރުވި އަދަދު ވަނީ 28،000 އަށް އަރާފައެވެ.
ސަލާމަތްވި ބައެއް މީހުންގެ ވާހަކަތައް:
110 ގަޑިއިރު: އަލްޒަޒީރާގެ ނޫސްވެރިޔަކު ރިޕޯޓްކޮށްފައިވާ ގޮތުގައި ކަހްރާމަންމަރަސް ސިޓީގެ، ބިންހެލުން އައި ސަރަހައްދުން ފިރިހެނަކު ވަނީ ސަލާމަތް ކޮށްފައެވެ.

"އެމްބިއުލާންސުގައި އެ މީހާ ވަނީ ހޮސްޕިޓަލަށް ގެންގޮސްފައި، އިތުރު ފިރިހެނަކުވެސް ވަނީ ފެނިފައި. ރެސްކިއުޓީމުތަކުން ގެންދަނީ އެ މީހާ ސަލަމާތްކުރަން އެތައް ކޮންނަމުން" އަލްޖަޒީރާގެ ނޫސްވެރިޔާ ބުންޏެވެ. ހަމަ އެ ސަރަހައްދުން ދޮޅު އަހަރުގެ އަންހެން ކުއްޖަކު ވެސް ދިރިހުއްޓާ ވަނީ ސަލާމަތްކޮށްފައެވެ.

https://twitter.com/Reuters/status/1623467965738885121

104 ގަޑިއިރު: ބިންހެލުމުގައި ދިރިތިއްބާ ވަޅުލެވުނު މީހަކު ވަނީ 104 ގަޑިއިރު ފަހުން ސަލާމަތްކޮށްފައެވެ. ކިރިހާން އަވަށުގައި ވެއްޓުނު އިމާރާތެއްގެ ކުނިތަކުގެ ތެރެއިން ސަލާމަތްކުރީ އުމުރުން 40 އަހަރުގެ ޒެއިނެޕް ކަހްރާމަން ނަމަކަށް ކިޔާ މީހެކެވެ.

އެ މީހާ ސަލާމަތްކުރެވުމާއެކު ރެސްކިއު ޓީމުތަކުން އެކަކު އަނެކަކުގެ ގައިގާ ބައްދާލާތަން ވީޑިއޯތަކުން ފެނެއެވެ. އެހާ ގިނައިރު ފަހުންވެސް މީހަކު ދިރިހުއްޓާ ފެނުމަކީ އެމީހުންނަށް ލިބޭ އެންމެ ބޮޑު އެއް އުފަލެވެ.

ތުރުކީގެ ދެކުނުގެ އަދްޔާމަން ޕްރޮވިންސްގައި، ބިންހެލުމުގައި ތާށިވިތާ 104 ގަޑިއިރު ފަހުން، ވެއްޓުނު އިމާރާތެއްގެ ކުނިތަކުގެ ތެރެއިން އުމުރުން 60 އަހަރުގެ ޔޫޕް އަކް ނަމަކަށް ކިޔާ މީހަކު ވަނީ ނަގާފައެވެ.

103 ގަޑިއިރު: ފުރަތަމަ ބިންހެލުން އައިތާ 103 ގަޑިއިރު ފަހުން އިސްލާހިޔޭ ޑިސްޓްރިކްޓްގެ ގަޒިއަންޓެޕް ޕްރޮވިންސުން އުމުރުން 66 އަހަރުގެ މުއްރަތު ވުރަލް ނަމަކަށް ކިޔާ މީހަކު ވަނީ ސަލާމަތްކޮށްފައެވެ. ތުރުކީގެ ނޭޝަނަލް މެޑިކަލް ރެސްކިއު ޓީމް (ޔޫއެމްކޭއީ) އާއި ފުލުހުން ގުޅިގެން 10 ގަޑިއިރުގެ މަސައްކަތަށް ފަހު ވުރަލް ވަނީ ކުނިތަކުގެ ތެރެއިން ނަގާފައެވެ.

https://twitter.com/KevorkAlmassian/status/1624176676732121090

ކަހްރާމަންމާރަސްގައި އަޒަރުބައިޖާންގެ ޓީމުތަކުން 103 ގަޑިއިރު ފަހުން ސީރިއާގެ 15 އަހަރުގެ އަންހެން ކުއްޖަކުވެސް ވަނީ ސަލާމަތްކޮށްފައެވެ.

ހަޓޭގައި އެންމެ ފުރަތަމަ ބިންހެލުން އައިތާ 103 ގަޑިއިރު ފަހުން ވެސް ވަނީ ތިން އަހަރުގެ އަންހެން ކުއްޖަކުވެސް ސަލާމަތްކޮށްފައެވެ.

102 ގަޑިއިރު: ކަހްރަމަންމަރަސް ޕްރޮވިންސްގެ އެލްބިސްތާން ޑިސްޓްރިކްޓްގައި ފުރަތަމަ ބިންހެލުން އައިތާ 102 ގަޑިއިރު ފަހުން ރެސްކިއު ޓީމުތަކުން ވަނީ އުމުރުން 33 އަހަރުގެ މުސްތަފާ ސާހިން ސާމީ ސަލާމަތްކޮށްފައެވެ. ހަތް ބުރީގެ އިމާރާތެއްގެ ކުނިތަކުގެ ތެރެއިން އޭނާ ސަލާމަތް ކުރުމަށް ޓީމުތަކުން 12 ގަޑިއިރު މަސައްކަތް ކުރިއެވެ.

101 ގަޑިއިރު: ތުރުކީގެ އިސްކެންދުރުންގައި ރެސްކިއު ވޯކަރުން ބުނީ ވެއްޓުނު އިމާރާތަކުން ހަ މީހަކު ނެގީ ބިންހެލުން އައިތާ 101 ގަޑިއިރު ފަހުން ކަމަށެވެ.

ހަޓޭ ޕްރޮވިންސްގައި ފުރަތަމަ ބިންހެލުން އައިތާ 101 ގަޑިއިރު ފަހުން ޒޮންގުލްޑަކް ޕްރޮވިންސްގެ މައިނާ ކްރޫއެއް ވަނީ މަންމައަކާއި ދަރިއަކު ސަލާމަތްކޮށްފައެވެ.

ކަހްރާމަންމާސް ޕްރޮވިންސްގައި މިދިޔަ ހުކުރު ދުވަހު ވަނީ އުމުރުން 15 އަހަރާއި 13 އަހަރުގެ ދެ ބެއިން ކުނީގެ ތެރެއިން ދިރިހުއްޓާ ނަގައިފައެވެ. އުމުރުން 15 އަހަރުގެ އެ ކުއްޖާ 99 ގަޑިއިރު ވަންދެން ތާށިވި އިރު، ކޮއްކޮ 101 ގަޑިއިރު ވަންދެން ތާށިވިއެވެ.

https://twitter.com/SadiqKhan/status/1624062163189997570

100 ގަޑިއިރު: 100 ގަޑިއިރު ވަންދެން އިމާރާތެއްގެ ދަށުގައި ތާށިވި އުމުރުން 32 އަހަރުގެ ނާއިމް ބަޔާސްލީ ސަލާމަތްކުރީ އުޒްބެކިސްތާނުގެ ރެސްކިއު ޓީމަކުންނެވެ.

96 ގަޑިއިރު: މިދިޔަ ހުކުރު ދުވަހު، ވެއްޓުނު އިމާރާތެއްގެ ކުނިތަކުގެ ތެރެއިން ދޮޅު އަހަރުގެ އަންހެން ކުއްޖަކު ހިމެނޭ ގޮތަށް އާއިލާއެއް ދިރިތިއްބާ ވަނީ ނަގާފައެވެ. އާއިލާގެ މެމްބަރުންގެ ތެރޭގައި ތުއްތު ކުއްޖާގެ މަންމަ، ބައްޕަ، ކޮއްކޮ އަދި ކާފަ ހިމެނެއެވެ. ހަޓޭގެ އަންޓަކްޔާ ޑިސްޓްރިކްޓްގައި 96 ގަޑިއިރު ވަންދެން ތާށިވެފައި ތިބުމަށް ފަހު އެ މީހުން ވަނީ ސަލާމަތްކޮށްފައެވެ.

ބިންހެލުމުގެ 96 ގަޑިއިރު ފަހުން ހުކުރު ދުވަހު ކަހްރާމަންމާރަސްގެ ރެސްކިއު ޓީމުތަކުން ވަނީ ސީރިއާގެ ޒުވާން އަންހެނެއް ކަމަށްވާ ފާތުމާ ކަރޫސް، 26، ސަލާމަތްކޮށްފައެވެ.