ކ. ވާވެއްދިފަރަށް އެރި ދެ ޓަގު ބޯޓެއް 100 މިލިއަން ރުފިޔާ އިން ޖޫރިމަނާ ކޮށްފިއެވެ.

އެންވަޔަރަމަންޓު ޕްރޮޓެކްޝަން އެޖެންސީ (އީޕީއޭ) އިން އިއްޔެ ބުނީ AM AAGAM ނަމަކަށް ކިޔާ ބާޖާއި AM ALPIT ނަމަކަށް ކިޔާ ޓަގު ބޯޓު މިދިޔަ އަހަރުގެ ޖުލައި މަހުގެ 22ވަނަ ދުވަހު ވާވެއްދިފަރަށް އެރި ކަމަށެވެ.
އެ އުޅަނދުތައް ފަރަށް އެރުމާއި ގުޅިގެން އެ ފަރުގެ މާހައުލަށް ލިބުނު ގެއްލުންތަކަށް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ގަވާއިދުގެ ދަށުން 100 މިލިއަން ރުފިޔާ އިން އެ އުޅަނދުގެ ވެރިފަރާތް ކަމުގައިވާ ދި މިޑްލްއީސްޓް މެރިން އެލް.އެލް.ސީ ޖޫރިމަނާކުރެވިފައިވާ ކަމަށެވެ. އަދި، އެ އެޖެންސީ އަށް 30 ދުވަހުގެ ތެރޭގައި އެ ޖޫރިމަނާގެ ފައިސާ ދެއްކުމަށް އެ ފަރާތަށް ވަނީ މިމަހުގެ 22ވަނަ ދުވަހު އަންގައިފައެވެ.
އެ އުޅަނދުތައް ފުންކޮށް ނިމުމުން އެ ސަރަޙައްދުގެ ތިމާވެށްޓަށް ލިބުނު ގެއްލުންތައް ބެލުމަށް އެ އެޖެންސީ އިން މިދިޔަ އަހަރުގެ އޮގަސްޓު މަހުގެ 13ވަނަ ދުވަހުގައި އެ ސަރަހައްދަށް ގޮސް ސާވޭ ކޮށްފައިވެއެވެ. އެ އުޅަނދުގެ ވެރިފަރާތުން ކުރި ސާވޭގައި އީޕީއޭގެ ފަރާތުން ވަނީ އޮބްޒާވަރެއްގެ ގޮތުން ބައިވެރިވެފައެވެ.
އެގޮތުން، ބެލިބެލުމުން އެ ފަރުގެ 3926 އަކަމީޓަރުގެ ސަރަހައްދަކަށް ބޮޑެތި ގެއްލުންތަކެއް ލިބިފައިވާކަން ފާހަގަކުރެވިފައިވާ ކަމަށް އީޕީއޭ އިން ބުންޏެވެ. އަދި، ތިމާވެށްޓަށް ލިބުނު ގެއްލުންތައް ބަލައި ވަޒަންކޮށް ކަނޑައެޅުނު ޖުމްލަ ޖޫރިމަނާއާއި ބަދަލުގެ އަދަދަކީ 148.3 މިލިއަން ރުފިޔާ ކަމަށްވެސް އީޕީއޭ އިން ބުންޏެވެ.
ނަމަވެސް، ގާނޫނުގެ ދަށުން ޖޫރިމަނާގެ ގޮތުގައި ކަނޑައެޅެން އޮންނަ އެންމެ ބޮޑު އަދަދަކީ 100 މިލިއަން ރުފިޔާ ކަމުގައިވާތީވެ، 100 މިލިއަން ރުފިޔާ ޖޫރިމަނާގެ ގޮތުގައި 30 ދުވަހުގެ ތެރޭގައި މއެ އެެޖެންސީއަށް ދައްކާ ހަލާސް ކުރުމަށް އަންގާފައިވާނެ ކަމަށް އީޕީއޭ އިން ބުނެއެވެ.
އީޕީއޭ އިން ބުނީ ބާޖު ފަރަށް އަރައިގެން ފަރަށް ލިބިފައިވާ ގެއްލުމުގެ ބަދަލު، ޝަރީއަތް މެދުވެރިކޮށް ހޯދުމުގެ މަސައްކަތް އެޓާނީ ޖެނެރަލްގެ އޮފީހާއި އެކުގައި ފެށުމަށް ކުރަންޖެހޭ ކަންތައްތައް އެ މައްސަލައިގެ އިސްތިއުނާފް މަރުޙަލާއިން ނިންމާ ގޮތެއްގެ މަތިން ފެށުމަށް ހަމަޖެހިފައިވާ ކަމަށެވެ.