ޔޫކްރެއިންގައި ހިނގަމުންދާ ހަނގުރާމަ ހުއްޓުވުމަށް، އިންޑިއާގެ ބޮޑުވަޒީރު ނަރެންދުރަ މޯދީ އިއްޔެ ރަޝިއާގެ ރައީސް ވްލަދިމީރު ޕޫޓިންއަށް އިލްތިމާސްކުރައްވައިފި އެވެ.

ހަމަނުޖެހުންތައް ދިގުދެމިގެންދާ ކޮންމެ ދުވަހަކީ އިންސާނީ ކަރާމާތާއި ކުރިއެރުމަށް އެޅޭ ހުރަހެއްކަން ފާހަގަކުރައްވަމުން، އަމާންކަން ގާއިމުކުރުމަށް ކުރެވޭ އެންމެހައި މަސައްކަތްތަކުގައި އިންޑިއާ ސާބިތުވެ އޮންނާނެކަމުގެ ޔަގީންކަން މޯދީ ދެއްވި އެވެ.

މޯދީ މިފަދައިން ވިދާޅުވީ، ކިރްގިޒްސްތާނުގެ ބިޝްކެކްގައި ބޭއްވުނު ޝަންހާއީ ކޯޕަރޭޝަން އޮގަނައިޒޭޝަން (އެސްސީއޯ) ގެ އެންމެ އިސްވެރިންގެ ބައްދަލުވުމުގެ ތެރެއިން ޕޫޓިންއާ އެކު ބޭއްވި ވަކި މަޝްވަރާތަކުގަ އެވެ. މި ބައްދަލުކުރެއްވުމުގައި، ދެ ގައުމުގެ ދެމެދުގައިވާ ވިޔަފާރިއާއި އިގްތިސާދީ ގުޅުންތައް ފުޅާވަމުން އަންނަ މިންވަރުގެ މައްޗަށް ވެސް އަލިއަޅުއްވާލެއްވި އެވެ.

ކްރެމްލިން އިން ނެރުނު ބަޔާނުގައި ވާގޮތުން، ސުލްހަ މަސަލަސްކަން ގާއިމުކުރުމަށް އެޅޭ ކޮންމެ ފިޔަވަޅަކަށް އިންޑިއާއިން އެއްބާރުލުން ދޭނެ ކަމަށާއި، މުސްތަގުބަލުގައި ވެސް އެ ސިޔާސަތު ބަދަލުނުވާނެ ކަމަށް މޯދީ ވަނީ ޕޫޓިންގެ އަރިހުގައި ވިދާޅުވެފަ އެވެ.

އަދި ހަމަނުޖެހުންތައް ކުރިއަށްދާ ކޮންމެ ވަގުތަކީ މުޅި އިންސާނިއްޔަތު ފަހަތަށް ޖެހިގެންދާ ކަމެއް ކަމަށާއި، އެހެންނަމަވެސް ސުލްހައަށްޓަކައި އެޅޭ ކޮންމެ ފިޔަވަޅަކީ ދުނިޔެއަށް އާ އުންމީދެއް ގެނެސްދޭނެ ކަމެއް ކަމުގައި ވެސް މޯދީ ފާހަގަކުރެއްވި އެވެ.

މީގެއިތުރުން، ދެ ފަރާތުން ވެސް މި ހަނގުރާމަ ނިމުމަކަށް ގެނައުމަށް އިސްކަންދީ، ހަމަލާތައް ބަދަލުކުރުން ހުއްޓާލުމުގެ މަގު އިޚްތިޔާރުކުރަންޖެހޭ ކަމަށް އެމަނިކުފާނު ވިދާޅުވި އެވެ.

ރަޝިއާގެ ސަރުކާރުގެ މީޑިއާތަކުން ރިޕޯޓުކޮށްފައިވާ ގޮތުގައި، އެ މަގަށް ވާސިލުވުމަށް އެ ގައުމުން މަސައްކަތްކުރަމުންދާ ކަމަށް ޕޫޓިން ވަނީ ވިދާޅުވެފަ އެވެ.

2022 ގައި ރަޝިއާއިން ޔޫކްރެއިނާ ދެކޮޅަށް ހަނގުރާމަ ފެށުމުން، ހުޅަނގުގެ ގައުމުތަކުން މޮސްކޯއާ ދެކޮޅަށް ހަރުކަށި ދަތިކުރުމުގެ ފިޔަވަޅުތަކެއް އެޅި ނަމަވެސް، ރަޝިއާގެ ސާފުނުކުރާ ތެޔޮ އެންމެ ބޮޑު މިންވަރަކަށް އިމްޕޯޓުކުރާ ދެ ގައުމަކީ ޗައިނާ އާއި އިންޑިއާ އެވެ.

ކްރެމްލިންއިން ހާމަކުރި ގޮތުގައި ހަނގުރާމައިގެ މައިދާނުގެ އެންމެ ފަހުގެ ހާލަތު ޕޫޓިން ވަނީ މޯދީއާ ހިއްސާކުރައްވާފަ އެވެ. ނަމަވެސް، ހަނގުރާމަ ހުއްޓާލުމަށް މޮސްކޯއިން ހުށަހަޅަމުންދަނީ ޔޫކްރެއިނަށް އެއްގޮތަކަށް ވެސް ބަލައިގަނެވެން ނެތް ޝަރުތުތަކެކެވެ.