ކަނޑުބޯޓަކުން ރާއްޖެއަށް ގެނައި މުދާ ކޮންޓޭނަރެއްގެ ތެރެއިން ފޮރުވައިގެން އެތެރެކުރަން އުޅުނު 5،600 ވޭޕް ކާޓްރިޖު މޯލްޑިވްސް ކަސްޓަމްސް ސާވިސްއިން އިއްޔެ ވަނީ އަތުލައިގެންފައެވެ.

ކަސްޓަމްސްއިން މިއަދު ހާމަކުރި ގޮތުގައި، މި ތަކެތި ފެނިފައިވަނީ ކަނޑުމަގުން އައި ޝިޕްމަންޓެއް ބަލައިފާސްކުރުމުގެ ތެރޭގައެވެ.

މި މުދާތައް އަތުލައިގަތުމަށް ހިންގި ހަރަކާތުގެ ވީޑިއޯއެއް ކަސްޓަމްސްއިން ވަނީ މީސްމީޑިއާގައި ހިއްސާކޮށްފައެވެ.

ކަސްޓަމްސްއިން ބުނި ގޮތުގައި، މި ތަކެތި ފެނިފައިވަނީ އާންމު މުދަލުގެ ގޮތުގައި ޑިކްލެއާކޮށްފައިވާ ޝިޕްމަންޓެއްގެ ތެރޭގައި ވަރަށް ބޮޑަށް ފޮރުވާފައި ހުއްޓައެވެ.

މިގޮތުން ފެނުނު 5،600 ވޭޕް ކާޓްރިޖު މިހާރު ވަނީ ކަސްޓަމްސްގެ ބެލުމުގެ ދަށަށް ގެންގޮސްފައެވެ.

މި މުދަލަކީ ކޮން ގައުމަކުން ފޮނުވި އެއްޗެއްކަމެއް ނުވަތަ މީގެ ވެރިފަރާތަކީ ކޮބައިކަމެއް ކަސްޓަމްސްއިން އަދި ހާމައެއް ނުކުރެއެވެ.

އެ އިދާރާއިން ބުނީ މި މައްސަލަ މިހާރު އިތުރަށް ތަހުގީގު ކުރަމުންދާ ކަމަށެވެ.