އިދިކޮޅު އެމްޑީޕީގެ މާލޭ ދާއިރާގެ ރައީސްކަމުގެ މަގާމަށް ކުރިމަތިލާން މާލޭގެ މިހާރުގެ މޭޔަރު އަދި މާލޭ މޭޔަރަމަށް އިތުރު ދައުރަކަށް މިހާރުވެސް އިންތިހާބުވެފައިވާ އާޒިމް އާޒިމް ނިންމަވައިފިއެވެ.

އާޒިމް އެކްސްގައި ކުރެއްވި ޕޯސްޓެއްގައި މިއަދު ވިދާޅުވީ މީގެ އަހަރެއް ކުރިން ބޭއްވުނު ބައި-އިލެކްޝަންގައި، މާލޭ ދާއިރާގެ ރައީސްކަމަށް އޭނާ އިންތިހާބުކޮށްދެއްވީ ވަރަށް މުހިއްމު ވައުދުތަކަކާއެކު ކަމަށެވެ.

"އެދުވަހު އަޅުގަނޑު ބުނި ފަދައިން، މާލޭގައި ޕާޓީގެ ހަރަކާތްތައް އިތުރުކޮށް، ބަހާއި އަމަލުން އެކަން މިހާރު ވާނީ اَلله (سبحانه وتعالى) ގެ ހެޔޮރަހުމަތުން ސާބިތުކޮށްދެވިފައި.‏އެގޮތުން މި ފާއިތުވި 2 އަހަރު މާލެ ސިޓީގައި އެމްޑީޕީ ވަރުގަދަ ކުރުމަށް އެންމެން އެކުގައި ވަނީ ގިނަ މަސައްކަތްތަކެއް ކުރެވިފައި،" އާޒިމް ވިދާޅުވިއެވެ.

އޭގެ ނަތީޖާއެއްގެ ގޮތުން މިއަދު މާލޭ ސިޓީ ކައުންސިލްގެ އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ސުޕާ މެޖޯރިޓީ އެމްޑީޕީއަށް އަނބުރާ ލިބިފައިވާކަން އާޒިމް ފާހަގަކުރެއްވިއެވެ.

‏އާޒިމްގެ ޕޯސްޓުގައި 2028 ގެ ރިޔާސީ އިންތިހާބު އެމްޑީޕީއަށް ކާމިޔާބު ކުރުމަށް ތައްޔާރުވަމުންދާ ދަނޑިވަޅުގައި، މާލެ ދާއިރާ އިތުރަށް ވަރުގަދަކޮށް، ކުރިއަށް އޮތް ތަނުގައިވެސް އެމްޑީޕީ މާލޭ މެމްބަރުންނާއެކު ސާބިތުވެ ހުރުމަށް ނިންމަވާފައިވާ ކަމަށް ވިދާޅުވިއެވެ.

"‏އެގޮތުން، 5 އަހަރުގެ ފުރިހަމަ ދައުރެއް ހޯދުމަށް، އެމްޑީޕީ ގައުމީ މަޖިލީހުގެ "މާލެ ސިޓީ ދާއިރާގެ ރައީސް" ކަމުގެ މަގާމަށް ދެންވެސް ކުރިމަތިލާން ނިންމި ވާހަކަ އުފަލާއެކު ހިއްސާކޮށްލަން،" އާޒިމް ވިދާޅުވިއެވެ.

އާޒިމް ވިދާޅުވީ‏ އޭނާއަށް އަބަދުވެސް އިތުބާރުކޮށް ވޯޓް ދެއްވި ފަދައިން، ކުރިޔަށް އޮތް އިންތިހާބުގައި ވެސް ވޯޓްދެއްވައި އެ މަގާމަށް އިންތިހާބު ކޮށްދެއްވުމަށް، އިހްލާސްތެރިކަމާއެކު އެމްޑީޕީގެ މާލޭގެ އާއްމު މެންބަރުންގެ އަރިހުން އެދިލައްވާ ކަމަށެވެ.