ޔުނައިޓެޑް އަރަބް އެމިރޭޓްސް (ޔޫއޭއީ) އަށް ރާއްޖޭން ކަނޑައަޅާފައި ހުންނެވި ސަފީރު މުހައްމަދު ހުސައިން ޝަރީފް (މުންދު) މަގާމުން ވަކިކުރައްވައިފިއެވެ.

ސޯޝަލް މީޑިއާގައި މި ވާހަކަތައް ދައުރުވާން ފެށުމާއެކު "ހަތާވީސް" އިން ރައީސް އޮފީހުގެ ތަރުޖަމާން ހީނާ ވަލީދާ އެ ސުވާލު ކުރުމުން އެކަމަނާ ވެސް ވަނީ އެއީ ތެދު ހަބަރެއްކަން ކަށަވަރު ކޮށްދެއްވައިފައެވެ.

މީގެއިތުރުން ޖެނީވާގައި އދ. އޮފީސްތަކަށް ކަނޑައަޅާފައި ހުންނަވާ ރާއްޖޭގެ ދާއިމީ މަންދޫބު ޑރ. ސަލްމާ ރަޝީދު ވެސް ވަނީ މަގާމުން ވަކިކުރައްވައިފައެވެ.

މި ދެބޭފުޅުންގެ ތެރެއިން މުންދު އަކީ މާފަންނު މެދު ދާއިރާގެ ރައްޔިތުން މަޖިލީހުގެ މެންބަރު އަސްމާ ރަޝީދުގެ ދަރިކަލުންނެވެ. އަދި ސަލްމާ އަކީ އަސްމާގެ ކޮއްކޮއެވެ.

ކުއްލިއަކަށް މި ދެ ބޭފުޅުން މަގާމުން ވަކި ކުރައްވާފައި މިވަނީ ނިމިދިޔަ ލޯކަލް ކައުންސިލްތަކުގެ އިންތިހާބުގައި ޕީއެންސީ އަށް ވޯޓު ނުދޭން ބާރު އަޅާ ގޮތަށް އަސްމާ އެހެން މީހަކާ ދެއްކި ވާހަކަތަކެއްގެ އޯޑިއޯ ލީކުވެފައިވާ ދަނޑިވަޅެއްގައެވެ.