ރައީސް ޑރ. މުހައްމަދު މުއިއްޒުގެ ސަރުކާރުން ގާނޫނުއަސާސީ އަށް މިހާރު ގެނެސްފައިވާ އިސްލާހަކީ އެ ގާނޫނުއަސާސީ އަށް ގެންނަން އުޅޭ ސިއްރު ބަޣާވާތެއް ކަމަށް ކުރީގެ ރައީސް އިބްރާހީމް މުހައްމަދު ސޯލިހު (އިބޫ) ރޭ ވިދާޅުވެއްޖެއެވެ.

ރައްޔިތުންގެ މަޖިލިސް އަދި ރިޔާސީ އިންތިހާބު އެއްކޮށް ބޭއްވުމަށް މަޖިލީހުން ނިންމާފައިވާ ނިންމުން ތަސްދީގު ކުރުމުގެ ކުރިން ނަގާ ހިޔާލު ހޯދުމުގެ ވޯޓު ކުރިޔަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީ އަށް މަސައްކަތް ކުރާ ކޮމެޓީތަކުގެ އިންތިހާބާއެކު ބޭއްވުމަށް ރައީސް ޑރ. މުހައްމަދު މުއިއްޒު ނެރުއްވި ގަރާރަކުން ވަނީ ނިންމަވައިފައެވެ.

އެ ބިލުގައި ހިމެނޭ އިސްލާހުތަކަކީ، ރައީސުލްޖުމްހޫރިއްޔާ އެ ބިލު ތަސްދީގުކުރެއްވުމުގެ ކުރިން، ގާނޫނުއަސާސީއަށް އެ އިސްލާހުތައް ގެނައުމަށް ރައްޔިތުން ރުހޭތޯ ބެލުމަށް ރައްޔިތުންގެ ހިޔާލު ހޯދުމުގެ ޢާންމު ވޯޓެއް ނެގުމަށް ޤާނޫނުއަސާސީގެ 262 ވަނަ މާއްދާގެ ދަށުން އަދި ރައްޔިތުންގެ ހިޔާލު ހޯދުމުގެ އާއްމު ވޯޓު ނެގުމުގެ ގާނޫނުގެ ދަށުން ރައީސުލްޖުމްހޫރިއްޔާއަށް ލާޒިމުކޮށްފައިވާ އިސްލާހުތަކެކެވެ.

ގާނޫނުއަސާސީގެ 262 ވަނަ މާއްދާގެ (ށ) ގައި ބަޔާންކޮށްފައިވާ ގޮތުން، އެ ބިލުގައި ހިމެނޭ އިސްލާހުތައް ގެނައުމަށް ރައްޔިތުންގެ މަޖިލީހުން ބިލެއް ފާސްކުރާ ހާލަތުގައި، ރައީސުލްޖުމްހޫރިއްޔާ އެ ބިލު ތަސްދީގުކުރާންވާނީ އެ އިސްލާހެއް ގެނައުމަށް ރައްޔިތުން ރުހޭތޯ ބެލުމަށް ނަގާ ރައްޔިތުންގެ ހިޔާލު ހޯދުމުގެ އާއްމު ވޯޓެއްގައި، އެ އިސްލާހެއް ގެނައުމަށް، ވޯޓުދިން މީހުންގެ އަޣުލަބިއްޔަތު ލިބިއްޖެނަމައެވެ.

ރޭ އެމްޑީޕީން ބޭއްވި ހަރުގެ ޖަލްސާގައި ވާހަކަދައްކަވަމުން ރައީސް ސޯލިހް ވިދާޅުވީ ސަރުކާރުން މިހާރު މަސައްކަތް އެ ކުރަނީ ރައްޔިތުންގެ އަޑު ކަނޑުވާލަން ކަމަށެވެ. އަދި ރައްޔިތުންގެ ބާރުވެސް ކަނޑާލަން ސަރުކާރުން މަސައްކަތް ކުރަމުން އަންނަ ކަމަށް ސޯލިހް ވިދާޅުވިއެވެ.

ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއް ދުވަހެއްގައި ބޭއްވުމާއި ގުޅޭ ގޮތުން އިތުރަށް ވާހަކަދައްކަވަމުން ސޯލިހް ވިދާޅުވީ 2014ވަނަ އަހަރު ބޭއްވި މަޖިލިސް އިންތިހާބާއި 2019 އަދި 2024ވަނަ އަހަރު ބޭއްވި މަޖިލިސް އިންތިހާބު ކާމިޔާބު ކޮށްފައި ވަނީ އެ އިރެއްގައި އޮންނަ ސަރުކާރަކުން ކަމަށެވެ.

"އަޅުގަނޑު މި ދަންނަވަން އުޅޭ ވާހަކައަކީ ވެރިކަމުގެ ނުފޫޒާ ބާރު އެހާ ކައިރީގައި އޮތީމާ ރައްޔިތުންގެ މަޖިލީހަށް ފޯރާފައިވާ މިންވަރު. 69 އެއް 75 ޕަސެންޓުން ގޮސް، 87 ޕަސެންޓާއި ހަމައަށް ވެރިކަމުގައި ހުންނަވާ ބޭފުޅަކު މަޖިލީހުގެ ކޮންޓްރޯލް ނަންގަވައިފި،" ކުރީގެ ރައީސް ސޯލިހް ވިދާޅުވިއެވެ.

އެމަނިކުފާނު ވިދާޅުވީ ދެ އިންތިހާބު އެއްކޮށްލުމުން ދެން ވެގެންދާނެ ގޮތް ރައްޔިތުން ވިސްނަން ޖެހޭ ކަމަށެވެ. ވެރިކަމުގައި ހުންނަވާ ބޭފުޅަކީ ވެރިކަމުގެ ބާރާއި ފައިސާ އަދި ވަޒީފާއާ އެކީގައި އިންތިހާބަށް ނިކުންނަވާނެ ބޭފުޅެއް ކަމަށާއި އެފަދައިން ކަންކަން ވެއްޖެ ނަމަ ދެ އިންތިހާބު އެއް ދުވަހެއްގައި ބޭއްވުމުން މުޅި މަޖިލިސް އެއްކޮށް ވެރިކަމުގައި ހުންނަވާ ބޭފުޅަކު ނަންގަވާނެ ކަމަށެވެ.

"ނަތީޖާއަކަށް ވެގެން ދާނީ ސަރުކާރު ޖަވާބުދާރީ ކުރުވުމަށް އޮތް ފުރުސަތު މުޅިން ގެއްލިގެން ދިއުން، މަޖިލީހުގައި ތިއްބަވާނީ މުޅިންވެސް ސަރުކާރު މެންބަރުން،" ސޯލިހް ވިދާޅުވިއެވެ.

ސޯލިހުގެ ވާހަކަފުޅުގައި 87 ޕަސެންޓާއެކު މުޅި މަޖިލިސް މިހާރުވެސް ކޮންޓްރޯލް ކުރައްވާއިރު ސަރުކާރު ޖަވާބުދާރީ ކުރުވުމަށް އެއްވެސް މަސައްކަތެއް ސަރުކާރު މެންބަރުން ކުރައްވާތަން ފެނިވަޑައިނުގަންނަވާ ކަމަށް ވިދާޅުވިއެވެ.