އިލެކްޝަންސް ކޮމިޝަންގެ މެންބަރުކަމުގެ މަގާމަށް އަލްއުސްތާޒު ރިފްއަތު އަބްދުﷲ އަދި ޖުޑީޝަލް ސާވިސް ކޮމިޝަންގެ މެންބަރުކަމުގެ މަގާމަށް އަލްއުސްތާޒު ހަސަން ޝަފީއު އައްޔަންކޮށްފިއެވެ.

މި ދެ ބޭފުޅުން އައްޔަން ކުރައްވާފައި ވަނީ ރައީސުލްޖުމްހޫރިއްޔާގެ އޮފީހުގައި އެކަމަށްޓަކައި ވަކިވަކިން ބޭއްވި ރަސްމިއްޔާތެއްގައެވެ. މަގާމުގެ ހުވާ ދެ ބޭފުޅުންވެސް ކުރައްވާފައި ވަނީ ރައީސް ޑރ. މުހައްމަދު މުއިއްޒުގެ ކުރިފުޅުމަތީގައެވެ. ހުވާ ލައިދެއްވީ ސުޕްރީމް ކޯޓުގެ ފަނޑިޔާރު އަލްއުސްތާޒު މުހައްމަދު ސަލީމެވެ.

މި ދެ ބޭފުޅުންގެ ތެރެއިން ރިފްއަތަކީ މީގެކުރިން އިލެކްޝަންސް ކޮމިޝަނުގެ ވަކީލެއްގެ ގޮތުގައި މަސައްކަތް ކުރައްވާފައިވާ ބޭފުޅެކެވެ.

އޭނާ އީސީގެ މެންބަރުކަމަށް އައްޔަން ކުރައްވާފައި މިވަނީ އެ ކޮމިޝަނުގެ މެންބަރުކަމުގައި ހުންނެވި ޑރ. މުހައްމަދު ޒާހިރުގެ މެންބަރުކަމުގެ މުއްދަތު ހަމަވާތީއެވެ.