ކުރިޔަށް އޮތް ލޯކަލް ކައުންސިލް އިންތިހާބުގައި ރަށްވެހިވެފައިވާ ރަށް ނޫން އެހެން ރަށަކަށް ވޯޓުލާ ފަރާތްތައް ރީ ރަޖިސްޓްރީވުމުގެ ފުރުސަތު އިލެކްޝަންސް ކޮމިޝަނުން ހުޅުވާލައިފިއެވެ.

އަންނަ މަހުގެ ހަތަރުވަނަ ދުވަހު އޮންނަ އިންތިހާބަށްޓަކައި، ވޯޓުލާ ތަން ބަދަލުކުރުމުގެ ފުރުސަތު މިއަދު ހެނދުނު 10:00 އިން ފެށިގެން ވަނީ ހުޅުވާލައިފަ އެވެ. މި ފުރުސަތު ކުރިއަށް އޮތް އަންގާރަ ދުވަހުގެ މެންދުރުފަހު 3:00 އާ ހަމައަށް އޮންނާނެ ކަމަށް އިލެކްޝަންސް ކޮމިޝަނުން މައުލޫމާތު ދެއެވެ.

އީސީން އިތުރަށް ހާމަކުރި ގޮތުގައި، މި މުއްދަތުގެ ތެރޭގައި ރީރަޖިސްޓްރީ ކުރަން ޖެހޭނީ އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި ވޯޓުލުމަށް ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލާން ބޭނުންވާ ފަރާތްތައް އެކަންޏެވެ.

އީސީން ހާމަކުރެއްވި ގޮތުގައި، މި އިންތިޚާބުގައި ޖުމްލަ 226 ދާއިރާއަކުން ލޯކަލް ކައުންސިލްތަކުގެ މެންބަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުން އިންތިޚާބުކުރެވޭނެއެވެ.

އިންތިހާބުގެ ވޯޓުލާ މަރުކަޒުތަކުގައި ހަރަކާތްތެރިވުމަށް 7,000 އަށްވުރެ ގިނަ އޮފިޝަލުން ބޭނުންވާތީ، މިހާރު ވަނީ އޮފިޝަލުން ހޯދުމަށް އިޢުލާނުކޮށްފައިވާ ކަމަށެވެ.