އިންޑިއާގެ ޖުމްހޫރީ ދުވަސް ފާހަގަކުރުމަށް ކުލަގަދަ ހަފްލާއެއް

އިންޑިއާގެ 77 ވަނަ ޖުމްހޫރީ ދުވަސް ފާހަގަކުރުމަށް މާލޭގައި ހުންނަ އިންޑިއާގެ ހައިކޮމިޝަނުން ގައުމީ ދުވަހުގެ ހަފުލާއެއް ބާއްވައިފިއެވެ.

އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި، މާލޭގައި ހުންނަ އިންޑިއާގެ ހައިކޮމިޝަނުން ބޭއްވި ހާއްސަ ހަފުލާ އޮތީ މާލޭގެ ސޯޝަލް ސެންޓަރުގައެވެ. އެ ރަސްމިއްޔާތުގެ ޝަރަފުވެރި މެހެމާނަކީ ފޮރިން މިނިސްޓަރު ޑރ. އަބްދުﷲ ހަލީލެވެ.

އެ ހަފުލާގައި ދިވެހި ސަރުކާރުގެ އިސް ވަޒީރުންނާއި، ސަރުކާރުގެ އިސް ބޭފުޅުންނާއި، ބޭރު ގައުމުތަކުގެ ސަފީރުންނާއި، ޕްރައިވެޓު ސެކްޓާގެ ބައެއް މަންދޫބުންގެ އިތުރުން އެކި ދާއިރާތަކުގެ އިއްޒަތްތެރިން ހިމެނޭހެން 500 އަށްވުރެ ގިނަ މެހެމާނުން ބައިވެރިވިއެވެ.

މަރުހަބާ ދެންނެވުމުގެ ގޮތުން ވާހަކަދެއްކެވީ އިންޑިއާ އިން ރާއްޖެ އަށް ކަނޑައަޅުއްވާފައި ހުންނަވާ ހައިކޮމިޝަނަރެވެ. އިންޑިއާގެ ހައިކޮމިޝަނަރު ވަނީ އިންޑިއާގެ ޖުމްހޫރީ ދުވަހުގެ މުހިންމުކަމުގެ މައްޗަށް އަލިއަޅުއްވާލައްވައި، ދިވެހިރާއްޖެއާއެކު އޮތް ގާތް ރަހުމަތްތެރިކަމާއި އެއްބާރުލުން އިތުރަށް ވަރުގަދަކުރުމަށް އިންޑިއާއިން ދޭ ސަމާލުކަން ތަކުރާރު ކުރައްވާފައެވެ.

އަދި އިންޑިއާ އާއި ރާއްޖޭގެ ގުޅުމުގެ ބިންގަލަކީ ޑިމޮކްރަސީގެ ހަމަތަކާއި، ދެގައުމުގެ ދެމެދުގައި އޮތް އިހުތިރާމާއި، ރައްޔިތުންނަށް އިސްކަންދީގެން ކުރިއަށްގެންދާ ތަރައްގީކަން އޭނާ ފާހަގަކުރެއްވިއެވެ.

ރޭގެ ހަފުލާގައި ވާހަކަފުޅު ދައްކަވަމުން ފޮރިން މިނިސްޓަރު ވަނީ ދެ ގައުމުގެ ދެމެދުގައި އޮތް ގިނަ ދާއިރާތަކެއް ހިމެނޭ ދިގު މުއްދަތުގެ ބައިވެރިވުމާ ބެހޭގޮތުން ވާހަކަފުޅު ދައްކަވާފައެވެ. މީގެ އިތުރުން، ދެ ގައުމުގެ ދެމެދުގައި ފަހަކަށް އައިސް ހާސިލުކުރެވުނު ކާމިޔާބީތަކަށް އަލިއަޅުއްވާލައްވަމުން، ދާދި ފަހުން ހުޅުވުނު ހަނިމާދޫ އިންޓަނޭޝަނަލް އެއާޕޯޓުގެ މަޝްރޫއު އޭނާ ފާހަގަކުރެއްވިއެވެ.

އެ މުނާސަބަތުގައި، އިންޑިއާ އާއި ރާއްޖެއާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރުން ފާހަގަކުރުމުގެ ގޮތުން، ދެ ގައުމުގެ ތާރީހީ ސިޔާސީ ދަތުރު ދައްކުވައިދޭ ހާއްސަ ފޮޓޯ މައުރަޒެއް މިނިސްޓަރު ހަލީލު އިފްތިތާހުކޮށްދެއްވިއެވެ. އެ މައުރަޒުން ފާއިތުވި އަހަރުތަކުގެ ތެރޭގައި ދެ ގައުމުގެ ދެމެދުގައި ހިނގާފައިވާ މުހިންމު ކަންތައްތަކާއި، މަތީ ފަންތީގެ ބައްދަލުވުންތަކާއި، ގާތް އެއްބާރުލުން ފެނިގެންދިޔައެވެ.

މިއީ ދެ ގައުމުގެ ދެމެދުގައި އޮތް ފުން ގުޅުމާއި، އިތުބާރާއި، އިންޑިއާ ކަނޑުގެ ސަރަހައްދުގެ ސުލްހަޔާއި ތަނަވަސްކަމަށް އޮތް ގުޅުން ރަމްޒުކޮށްދޭ މައުރަޒެކެވެ. އެ ހަފުލާގައި އިންޑިއާގެ ހާއްސަ "ގައްވާލީ" ގްރޫޕެއްގެ ފަރާތުން ހުށަހަޅައިދިން ސަގާފީ ހަރަކާތްތަކަށް މެހެމާނުންގެ ބޮޑު ތަރުހީބެއް ލިބިގެންދިޔައެވެ.

އެ ހަފުލާގެ އެންމެ ފާހަގަކޮށްލެވޭ އެއް ކަމަށްވެގެން ދިޔައީ އިންޑިއާގެ އެކި ކަންކޮޅުތަކުގެ ރަހަތައް ހިމެނޭހެން ތައްޔާރުކޮށްފައިވާ ހާއްސަ ކެއުންތަކެވެ.