ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)ގެ ރައީސްކަމުގެ މަގާމަށް ޑރ. އާއިޝަތު ރަމީލާ އައްޔަން ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

އެޗްއާރްސީއެމް އަށް ރަމީލާ އައްޔަން ކޮށްދެއްވުމަށް އެދި ރައީސް ޑރ. މުހައްމަދު މުއިއްޒު ވަނީ ރައްޔިތުންގެ މަޖިލީހަށް ސިޓީފުޅެއް ފޮނުއްވައިފައެވެ.

އިއްޔެ ބޭއްވި މަޖިލީހުގެ ދައުރުން ބޭރުގެ ޖަލްސާގައި އެ ސިޓީފުޅު މަޖިލީހުގެ ތަޅުމަށް އިއްވެވިއެވެ. އަދި ހިއުމަން ރައިޓްސް އެންޑް ޖެންޑާ ކޮމެޓީއަށް މައްސަލަ ފޮނުއްވިއެވެ

މިއަދު ވެސް ވަނީ ދައުރުން ބޭރުން ޖަލްސާއެއް ބާއްވައިފައެވެ. އެ ޖަލްސާގައި މި މައްސަލައަށް ވޯޓަށް އަހާފައިވެއެވެ. ވޯޓުގައި ބައިވެރިވެވަޑައިގެންނެވި 38 މެންބަރުންގެ އިއްތިފާގުން ފާސްވީ ރަމީލާ އެޗްއާރްސީއެމްގެ ރައީސްކަމުގެ މަގާމަށް އައްޔަން ކުރުމަށެވެ.