މިފްކޯ އިން ގަންނަ މަހުގެ ބަރުދަނާއި އަގަށް ބޮޑު ބަދަލެއް

މިފްކޯ އަށް ގަންނަ ކަޅުބިލަ މަހުގެ ތެރެއިން ރަނގަޅު އަގު ލިބޭ މަހުގެ ސައިޒަކީ 1.5 ކިލޯ ކަމަށް ނިންމާފައި އޮތް އޮތުން ބަދަލުކޮށްފިއެވެ.

ސަރުކާރުން ގެނެސްފައިވާ މި ބޮޑު ބަދަލު އިއުލާން ކުރީ މަސްވެރިންގެ ދުވަހާ ގުޅިގެން ރ. ދުވާފަރުގައި މިހާރު ކުރިޔަށް ގެންދާ ޖަލްސާގައި ރައީސް ޑރ. މުހައްމަދު މުއިއްޒެވެ.

"މިއަދުން ފެށިގެން ގެންނަ މައިގަނޑު އެެއް ބަދަލަކީ ދޮޅު ކިލޯގެ ބަދަލުގައި އެއް ކިލޯއިން ފެށިގެން މަތީގެ މަހަށް އެންމެ މަތީ ރޭޓުގައި މަސް ގަންނަ ގޮތަށް ބަދަލުކުރުން،" ރައީސް ވިދާޅުވިއެވެ.

މިފްކޯ އިން ކުދި ކަންނެއްޔަށާއި ކަޅުބިލަ މަހަށް މިހާރު ދޭ އެންމެ ބޮޑު އަގަކީ 16 ރުފިޔާއެވެ. ކުދި މަސް ކަމަށް އެ ކުންފުނިން ބަލާ މިންގަނޑަކީ 1.5 ކިލޯއެވެ.

"މިފްކޯއަށް އެ ދުވަހަކު 17ރ. އަށް ގަނެވެންޏާ، 18ރ. އަށް ގަނެވެންޏާ އެ ބޭފުޅުން އަދި އެއަށް ވުރެ މައްޗަށް ވެސް ގަނެވެންޏާ މިފްކޯ އިން ކަނޑައަޅާނެ އެ ވަގުތަކު ގަނެވޭނެ އެންމެ މަތީ އަގު،" ރައީސް ވިދާޅުވިއެވެ.