މެދު ރާއްޖެތެރޭގެ ރަށެއްގައި ކުޑަކުއްޖަކަށް ގަދަކަމުން ސިނގިރޭޓު ބޯންދިން މައްސަލަ ފުލުހުން ބަލަން ފަށައިފިއެވެ.

އެކަމާއި ގުޅިގެން ފުލުހުން މިއަދު ބުނީ ދައުލަތުގެ ބެލުމުގެ ދަށުގައި އަތޮޅުތެރޭގެ ރަށެއްގައި ތިބޭ ކުދިންތަކެއް އެ ރަށުގެ ކުއްޖަކަށް ގަދަކަމުން ސިނގިރޭޓް ދިން މައްސަލަ އިއްޔެ ހަވީރު 18:35 ހާއިރު ރިޕޯޓްކޮށްފައިވާ ކަމަށެވެ. އަދި އެ މައްސަލަ ކަމާ ގުޅޭ އިދާރާތަކާ ގުޅިގެން ބަލަމުން އަންނަ ކަމަށެވެ.

ސޯޝަލް މީޑިއާގައި އެ ކުއްޖާގެ ބައްޕަ ހާމަކުރި ގޮތުގައި، އޭނާގެ 10 އަހަރުގެ ފިރިހެން ދަރިފުޅު މަޣުރިބު ނަމާދަށް ދަނިކޮށް، ސޯޝަލް އެންޑް ފެމިލީ މިނިސްޓްރީގެ ބެލުމުގެ ދަށުގައި ތިބޭ 17 އަހަރުގެ ދެ ކުދިން ވަނީ އޭނާއަށް ބިރުދައްކާފައެވެ. އެ ދެ ކުދިން މިކަން ކޮށްފައި ވަނީ އެ ކުއްޖާ ގަދަކަމުން ފަޅު ތަނަކަށް ގެންދިއުމަށް ފަހު ކަމަށް ކުއްޖާގެ ބައްޕަ ބުނެފައިވެއެވެ.

އެ ކުއްޖާގެ ބައްޕަ އިތުރަށް ބުނި ގޮތުގައި، އޭނާގެ ދަރިފުޅާއި މެދު އެގޮތަށް އަމަލުތައް ބެހެެއްޓި ދެކުދިން ވަނީ އެ ކުއްޖާއަށް ގަދަކަމުން ސިނގިރޭޓު ބޯންދޭން މަސައްކަތްކޮށްފައެވެ.

އަދި އެ ކުއްޖާގެ ހަށިގަނޑުގައި ސިނގިރޭޓު ބަޓު ޖައްސައި، އެކަމުގެ ވާހަކަ މައިންބަފައިންގެ ގާތުގައި ބުނެފިނަމަ މަރާލާނެ ކަމުގެ އިންޒާރު ވެސް ދީފައިވާ ކަމަށް ބައްޕަ ބުންޏެވެ.

އެ ހާދިސާއަށް ފަހު ކުއްޖާ ހުރީ ބިރުން ކަމަށާއި އެކުއްޖާ އަށް ވާހަކަ ވެސް ދައްކަން އުނދަގޫ ވެފައިވާ ކަމަށް ބުންޏެވެ.

މިއީ އެއްވެސް ގޮތަކަށް ބަލައިނުގަނެވޭނެ ކަމަށް ނޫން ކަމަށާއި، ސަރުކާރާއި ޖެންޑާ މިނިސްޓްރީ އަދި ފުލުހުން މި މައްސަލަ އަވަހަށް ބަލައި، އިންސާފު ހޯދައިދިނުމަށް އެކުއްޖާގެ ބައްޕަ ވަނީ ގޮވާލައިފައެވެ. އަދި އެއްވެސް ކުއްޖަކު ބިރުވެރިކަމެއްގެ ތެރޭގައި އުޅެން ޖެހިގެން ނުވާނެ ކަމަށް ވެސް އޭނާ ބުންޏެވެ.