ސޯޝަލް ހައުސިން އަށް ބޭންކް އޮފް މޯލްޑިވްސް (ބީއެމްއެލް) އިން ދޫކުރި ލޯނުތަކުގެ އިންޓްރެސްޓު ކުޑަކޮށްދޭން ރައީސް ޑރ. މުހައްމަދު މުއިއްޒު އެދިވަޑައިގެންފިއެވެ.

އެމަނިކުފާނު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ބީއެމްއެލް އިން ހިޔާ ފްލެޓްތައް ނިންމުމަށް ދޫކޮށްފައިވާ 535 ލޯނާއި، ވިނަރެސް ފްލެޓް ގަތުމަށް ދޫކޮށްފައިވާ 26 ލޯނަކީ، ‏ސޯޝަލް އަދި އެފޯޑަބަލް ހައުސިންގ މަޝްރޫއުތަކަށް ދޫކޮށްފައިވާ ލޯނުތަކެއް ކަމަށެވެ.

އެ ލޯނުތަކަށް ލުއި ގޮތްތަކެއް ހޯދުމަށް ބީއެމްއެލްއާއެކު މަޝްވަރާ ކުރެވިފައިވާ ކަމަށާއި ‏ހިޔާ ފްލެޓުތަކުގެ ފިނިޝިން ލޯނަށް މިހާރު ކަނޑައަޅާފައިވާ އިންޓަރެސްޓް ރޭޓް 12 ޕަސެންޓުން 10 ޕަސެންޓަށް ކުޑަ ކުރުމަށާއި، ލޯނު ދެއްކުމަށް ދަތިވެ ޑީފޯލްޓް ވެފައިވާ ފަރާތްތައް ރެގިއުލަރައިޒް ކުރެވޭނެ ޕޭމަންޓް ޕްލޭނެއް ހައްދަވައި ދެއްވުމަށް އެދިވަޑައިގެންފައިވާ ކަމަށެވެ.

‏އަދި ވިނަރެސް ފްލެޓް ގަތުމަށް ދޫކޮށްފައިވާ ލޯނަށް މިހާރު ކަނޑައަޅާފައިވާ އިންޓަރެސްޓް ރޭޓް 9 ޕަސެންޓުން 8 ޕަސެންޓަށް ކުޑަ ކުރުމަށް އެދިވަޑައިގެންފައިވާ ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ އެއީ ކުރެވިދާނެ ކަމެއް ކަމަށް ބީއެމްއެލް އިން މައުލޫމާތު ލިބިފައިވާ ކަމަށާއި އެހެންކަމުން އުސޫލުގެ ތެރެއިން އެކަންތައް ކޮށްދެއްވުމަށް ދަންނަވާފައިވާނެ ކަމަށެވެ.