މާލެއިން މުދާ ބަރުކޮށްގެން ގދ. ފަރެސްމާތޮޑާ އަށް ދަތުރުކުރި ބޯޓެއް ވ. ފެލިދޫ ކައިރީ އޮންނަ ފަރަކަށް އަރައިފިއެވެ.

ފުލުހުން މިއަދު ބުނީ އެ ހާދިސާ ހިނގާފައިވާކަމުގެ ރިޕޯޓު އިއްޔެ ފަތިހު 5:01 ހާއިރު ފުލުހުންނަށް ލިބިފައިވާ ކަމަށާއި "ފަހިރޯޅި" ނަމަކަށް ކިޔާ އެ ބޯޓުގެ މައްޔާ ފަޅައިގެންގޮސް ދިޔަވެ ބޯޓުގެ ބޮޑު ބައެއް އަޑިއަށް ގޮސްފައިވާ ކަމަށެވެ.

ބޯޓް ފަރަށް އެރި އިރު އޭގައި 12 މީހުން ތިބި ކަމަށް ފުލުހުން ބުންޏެވެ. އޭގެތެރޭގައި ބޯޓުގެ ވެރިފަރާތް ވެސް ހިމެނެއެވެ.

އެ މީހުން ފުލުހުންގެ އެހީތެރިކަމާއެކު ފެލިދުއަށް ގެންގޮސްފައިވާ ކަމަށް ފުލުހުން ބުންޏެވެ.