ނިޝާން ޣާޒީގެ އިއްޒަތުގެ ވެރިޔާ އަދި ކުރީގެ ރައީސް މައުމޫން އަބްދުލްގައްޔޫމަށް މިއަދު އެރުއްވި ނޮވެމްބަރު 3ގެ ޝަރަފުގެ އައްޑަނައިގެ ހައްގުވެރިންނަކީ ދިވެހި ރައްޔިތުން ކަމަށް އެމަނިކުފާނު ވިދާޅުވެއްޖެއެވެ.

ނަސްރުގެ ދުވަސް ފާހަގަކުރުމަށް، ސޯޝަލް ސެންޓަރުގައި މިއަދު ހެނދުނު ބޭއްވި ރަސްމީ ޖަލްސާގައި ނޮވެންބަރު 3ގެ ޝަރަފުގެ ހާއްސަ އައްޑަނަ އަދި ނޮވެންބަރު 3ގެ ޝަހީދުންގެ އާއިލާތަކަށް ހަނދާނީ އައްޑަނަ އެރުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.

ރައީސް މައުމޫނަށް އެ އައްޑަނަ އެރުވީ، ނޮވެންބަރު މަހުގެ 3 ވަނަ ދުވަހުގެ އުދުވާނީ ހަމަލައިގައި އޭރުގެ ރައީސުލްޖުމްހޫރިއްޔާ ކުރެއްވި ތައުރީފު ހައްގު މަސައްކަތްޕުޅުތަކަށް ވާތީއެވެ.

މައުމޫން އެމަނިކުފާނުގެ އެކްސްގައި މިއަދު ކުރެއްވި ޕޯސްޓުގައި ވިދާޅުވީ ނޮވެމްބަރު 3ގެ ޝަރަފުގެ ހާއްސަ އައްޑަނަ އެމަނިކުފާނަށް ދެއްވިކަމަށްޓަކައި އިއްޒަތްތެރި ރައީސުލްޖުމްހޫރިއްޔާ މުހައްމަދު މުއިއްޒަށް ⁦އިހުލާސްތެރިކަމާއެކު ޝުކުރުދަންނަވާ ކަމަށެވެ.

"‏އަޅުގަނޑުގެ ނަޒަރުގައި މިފަހުރުވެރި އައްޑަނައިގެ ހައްގުވެރިންނަކީ ހިތްވަރުގަދަ ލޮބުވެތި ދިވެހި ރައްޔިތުން،" މައުމޫން ވިދާޅުވިއެވެ.

ނޮވެންބަރު 3 ގެ އުދުވާނީ ހަމަލާގައި ސިފައިންގެ ތެރެއިން ޝަހީދުވީ 8 ބޭފުޅުންނެވެ. އަދި އާއްމުންގެ ތެރެއިން ޝަހީދުވީ 11 ބޭފުޅުންނެވެ.