އެމްޑީޕީ ސަރުކާރުގައި ބަންޑާރަ ނާއިބުގެ މަގާމުގައި ހުންނެވި އިބްރާހީމް ރިފްއަތު ވެސް އެންޓި ކޮރަޕްޝަން ކޮމިޝަން (އޭސީސީ) އަށް ހާޒިރުވާން އަންގައިފިއެވެ.

ރިފްއަތު އޭސީސީއަށް ހާޒިރުވާން އެންގިކަން ހާމަކުރެއްވީ ކުރީގެ ރައީސް އިބްރާހީމް މުހައްމަދު ސޯލިހު (އިބޫ) އެކްސްގައި މުރޭ ކުރެއްވި ޕޯސްޓެއްގައެވެ.

އިބޫ ވިދާޅުވީ މިއީ ކަންބޮޑުވާން ޖެހޭ ކަމެއް ކަމަށެވެ. މިއީ މިނިވަން މުއައްސަސާތަކަށް ސަރުކާރުން ސިޔާސީ ނުފޫޒު ފޯރުވައިގެން އެމްޑީޕީގެ މެންބަރުންނަށް ބިރުދެއްކުމުގެ ގޮތުން ހިންގާ ސިލްސިލާ ހަރާކާތެއް ކަމަށް އެމަނިކުފާނު ވިދާޅުވިއެވެ.

"‏ސިޔާސީ ނުފޫޒުގަ ޖެހި ރައްޔިތުންގެ އިތުބާރު ގެއްލޭ މިޒާތުގެ ކަންކަން ނުކުރުމަށް އޭސީސީގެ ވެރިންނަށް އިލްތިމާސްކުރަން،" ކުރީގެ ރައީސް ވިދާޅުވިއެވެ.

ކުރީގެ ބަންޑާރަ ނާއިބު ރިފްއަތު އޭސީސީއަށް ހާޒިރުވާން އެންގިއިރު ކުރީގެ ފިނޭންސް މިނިސްޓަރު އިބްރާހީމް އަމީރާއި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ވެސް ވަނީ އެ ކޮމިޝަނަށް ހާޒިރު ކޮށްފައެވެ.