ކީރިތި ގުރުއާން ކިޔެވުމަކީ ފަހުރެއް ކަމުގައި ދެކުމަކީ ބޭނުންވާ ކަމެއް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ކީރިތި ގުރުއާން ކިޔެވުމުގެ 37ވަނަ ގައުމީ މުބާރާތުގެ އިނާމު ދިނުމުގެ ޖަލްސާ ޝަރަފުވެރި ކޮށްދެއްވަވާ ވާހަކަދައްކަވަމުން ރައީސް މުއިއްޒު ވިދާޅުވީ ގުރުއާން ކިޔެވުމަކީ ފަހުރެއްގެ ގޮތުގައި މަސައްކަތް ކުރުމަށް ސްކޫލްތަކުން އެންމެ އިސްކަމެއްދޭ ކަމެއްގެ ގޮތުގައި ކުރަން އެދިވަޑައިގަންނަވާ ކަމަށެވެ.

"ހެޔޮގޮތުގައި ކުރިއަށްދިޔުމަށް ވާދަވެރިކަން އުފެއްދުމަކީ، ދީނުގައި އޮންނަ ގޮތް. ތަގުވާވެރިކަމުގެ ގޮތުން ނޫނީވިއްޔާ ތަފާތުވުމެއް ނެތް އިންސާނުންގެ މެދުގައެއް. ދީނުގެ މަގުގައި ކުރިއަށްދިޔުމުގައި ނޫނީވިއްޔާ، ވާދަކުރުމެއް ހަގީގަތުގައި އޮވެގެން ނުވާނެ،" ރައީސް ވިދާޅުވިއެވެ.

ގައުމީ ގުރުއާން ކިޔެވުމުގެ މުބާރާތުގައި ރައީސް ވާހަކަދައްކަވަނީ: ފޮޓޯ | ރައީސް އޮފީސް

އެ މަގުސަދު ހާސިލުކުރުމުގައި އެންމެންވެސް އެއް ވިސްނުމެއްގައި މުޅި ގައުމު އެކަތިގަނޑަކަށްވެގެން ކުރިއަށްދާން ރައީސް ވަނީ އިލްތިމާސް ކުރައްވައިފައެވެ.

"އާދެ، މި ގައުމުގައި އެންމެ އިސްކަންދޭންޖެހޭނީ އަޅުގަނޑު ހަމަ ދެންމެ ދެންނެވިފަދައިން، ކީރިތި ގުރްއާން ކިޔެވުމަށް. އެންމެ މަތިވެރި އިނާމު ލިބެންޖެހޭނީ ކީރިތި ގުރްއާން ރީތިކޮށް ކިޔެވުމަށް. ކިޔަވައިގެން ލިބޭ ވަނައަށް،" ރައީސް ވިދާޅުވިއެވެ.

ގައުމީ ގުރުއާން ކިޔެވުމުގެ 37ވަނަ މުބާރާތުގައި ވަނަވަނައަށް ދިޔަ ދަރިވަރުންނަށް އިނާމު ދިނުމުގެ ރަސްމިއްޔާތުގެ ތެރެއިން: ފޮޓޯ | ރައީސް އޮފީސް

ރައީސްގެ ވާހަކަފުޅުގައި ފަލާހާއި ކާމިޔާބާއި ކުރިއެރުމާ، ހުރިހާ ކަމެއްވެސް ދެ ދުނިޔޭގައިވެސް ލިބެންއޮތީ، ކީރިތި ގުރްއާނުގައި އަންގަވާފައިވާ ގޮތަށް ކުރިއަށްގޮސްގެންކަން ފާހަގަކުރެއްވިއެވެ.