މީޑިއާ ކޮންޓްރޯލް ކުރެވޭ ގޮތަށް ރައްޔިތުންގެ މަޖިލީހަށް ހުށަހަޅާފައިވާ މީޑިއާ އެންޑް ބްރޯޑްކާސްޓިން ރެގިއުލޭޝަން ބިލުގެ މަސައްކަތް ކުރަމުން އަންނަ މިނިވަން މުއައްސަސާތަކާއި ބެހޭ ކޮމެޓީ ސިއްރު ކުރުމަށް ނިންމާ ކޮމެޓީގައި ތިބި ނޫސްވެރިން ބޭރު ކުރުމުން ނޫސްވެރިން އިހުތިޖާޖު ކުރަން ފަށައިފިއެވެ.

ބިލު ދިރާސާ ކުރާ ކޮމެޓީން މިއަދު ބޭއްވި ބައްދަލުވުން ސިއްރު ކުރަން ނިންމީ ބިލާ ގުޅިގެން އާއްމުން ހުށަހަޅާފައިވާ ހިޔާލުތައް ހުށަހަޅާއިރު ޒާތީ މައުލޫމާތު އާއްމު ވެދާނެ ކަމަށް ބުނެއެވެ. ބައެއް މާއްދާތަކަށް 10-12 ހިޔާލު ލިބިފައިވާ ކަމަށް ކޮމެޓީގެ މުގައްރިރު ހުސައިން ރިޒާ ވިދާޅުވިއެވެ.

ކޮމެޓީން މީގެކުރިން އެޗްއާރްސީއެމް އާއި ބްރޯޑްކޮމް އަދި އެމްއެމްސީގެ މެންބަރުން ހާޒިރުކޮށް ބިލާ ގުޅޭ ގޮތުން ހިޔާލު ހޯދިއެވެ. އަދި މީޑިއާތަކުން ނޫސްވެެރިން ވެސް ހާޒިރުކޮށް ހިޔާލު ހޯދިއެވެ.

ނަމަވެސް ޔޫތު މިނިސްޓަރާއި ބަންޑާރަ ނާއިބު ކޮމެޓީއަށް ހާޒިރު ކުރަން އޮތް ކޮމެޓީ ބައްދަލުވުން ފަހު ވަގުތު ކެންސަލްކުރިއެވެ.

އަމިއްލަ މެމްބަރެއްގެ ގޮތުގައި މަޖިލީހުގައި އިންނެވި ތުޅާދޫ ދާއިރާގެ މެމްބަރު އަބްލްހަންނާން އަބޫބަކުރު މަޖިލީހަށް ހުށަހެޅުއްވި އެ ބިލުގެ މަސައްކަތް މިމަހުގެ 15 ވަނަ ދުވަހުގެ ނިޔަލަށް ނިންމަން ވަނީ ކޮމެޓީން ނިންމައިފައެވެ.

މީޑިއާތަކާއި ނޫސްވެރިން ޖޫރިމަނާކުރާ ގޮތް:

  • ބްރޯޑްކާސްޓަރުން ޖޫރިމަނާކުރެވޭނީ ލިބޭ އާމްދަނީގެ 10 ޕަސެންޓަށް ވުރެ ބޮޑު ނޫން އަަދަދަކުން
  • ނޫސްމަޖައްލާތައް ޖޫރިމަނާކުރެވޭނީ 5،000 ރުފިޔާ އާއި 100،0000 ރުފިޔާއާ ދެމެދު
  • ވަކިވަކި ނޫސްވެރިން ޖޫރިމަނާކުރެވޭނީ 5،000 ރުފިޔާ އާއި 25،000 ރުފިޔާއާ ދެމެދު

އެ ބިލުގެ ދަށުން އުފައްދާ މީޑިއާ ކޮމިޝަންގައި ހަތް މެމްބަރުން ތިއްބަވާނެއެވެ. ފަސް އަހަރު ދުވަހަށް އައްޔަން ކުރާ މެމްބަރުންގެ ތެރެއިން ތިން މެންބަރަކު އައްޔަން ކުރާނީ ރައީސުލްޖުމްހޫރިއްޔާއެވެ. އަދި އަނެއް ހަތަރު މެމްބަރުން އިންތިހާބު ކުރާނީ މީޑިއާތަކާއި ނޫސްވެރިންގެ މެދުގައި ނަގާ ވޯޓަކުންނެވެ. އެ އިންތިހާބު ބާއްވާނީ އިލެކްޝަންސް ކޮމިޝަން (އީސީ)އިން ކަމަށް ބިލުގައި ބުނެފައިވެއެވެ.

ބިލުގައި ބުނެފައިވާ ގޮތުން ކޮމިޝަނަށް ރައީސަކު އައްޔަން ކުރާނީ ރައީސުލްޖުމްހޫރިއްޔާއެވެ. ނަމަވެސް ނައިބު ރައީސް އައްޔަން ކުރާނީ ކޮމިޝަންގެ މެމްބަރުންގެ މެދުގައި ނަގާ ވޯޓަކުންނެވެ.

ބިލުގެ ދަށުން ކޮމިޝަންގެ ރައީސަށް ބޮޑެތި ބާރުތަކެއް ލިބިގެންވެއެވެ. އެގޮތުން ގާނޫނުގެ ދަށުން ކޮމިޝަނުން ކުރަންޖެހޭ އެންމެހައި މަސައްކަތް ރާވައި ހިންގާނީ ކޮމިޝަންގެ ރައީސެވެ. ކޮމިޝަންގެ ރިޔާސަތު ބެލެހެއްޓުމާއި މަސައްކަތް ހަވާލު ކުރުމުގެ ހުރިހާ ޒިންމާއެއް ވެސް މަތިކޮށްފައި ވަނީ ކޮމިޝަންގެ ރައީސަށެވެ.

ބިލުގައި ބުނެފައިވާ ގޮތުން މީހެއްގެ ނުވަތަ ބައެއްގެ ހުރުމަތް ކެނޑިދާނެފަދަ، ނުވަތަ އިއްޒަތާއި ގަދަރަށް އުނި ކަމެއް އަތުވެދާނެފަދަ ނުވަތަ ކޮންމެވެސް ސިފައެއްގައި ނިކަމެތި ކަމެއް ލިބިދާނެ ބަސްތަކާއި މުޖުތަމައުގައި ބޭނުންކުރުމަށް އެކަށީގެންނުވާ ބަސްތަކާއި އިޝާރާތާއި ހަރަކާތާއި އަމަލުތައް ހިމެނޭ އެއްވެސް އެއްޗެއް ނުދެއްކުން އަދި ޝާއިއު ނުކުރުން ހިމެނެއެވެ.