މީޑިއާ ކޮންޓްރޯލް ކުރެވޭ ގޮތަށް ރައްޔިތުންގެ މަޖިލީހަށް ހުށަހަޅާފައިވާ މީޑިއާ އެންޑް ބްރޯޑްކާސްޓިން ރެގިއުލޭޝަން ބިލު އޮތީ ނޫސްވެރިކަމާއި ހިޔާލުފާޅުކުރުމުގެ ހައްގު ވެސް ގެއްލޭ ގޮތަށް ކަމަށް މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސް ހުސައިން ޝަގީފް ވިދާޅުވެއްޖެއެވެ.

ރައްޔިތުންގެ މަޖިލީހުގައި އަމިއްލަ މެމްބަރެއްގެ ގޮތުގައި އިންނެވި، ތުޅާދޫ ދާއިރާގެ މެމްބަރު އަބްދުލްހަންނާން އަބޫބަކުރު ހުށަހެޅުއްވި ބިލު މިހާރު އޮތީ ކޮމެޓީ މަރުހަލާގައެވެ.

މިނިވަން މުއައްސަސާތަކާއި ބެހޭ ކޮމެޓީން ދިރާސާ ކުރަމުން އަންނަ އެ ބިލުގެ މަސައްކަތް އަންނަ މަހުގެ 15ވަނަ ދުވަހުގެ ކުރިން ނިންމަން ވަނީ ނިންމައިފައެވެ.

ބިލާ ގުޅެ ގޮތުން ކޮމެޓީގައި މިއަދު ވާހަކަދައްކަވަމުން ޝަގީފް ވިދާޅުވީ ބިލު ޑްރާފްޓް ކޮށްފައި ވަނީ ކަމާ ގުޅުންހުރި އެއްވެސް ބަޔަކާ މަޝްވަރާ ނުކޮށް ކަމަށެވެ. އަދި އެކަމާ ކަންބޮޑުވާ ކަމަށް އޭނާ ވިދާޅުވިއެވެ.

އަދި މީޑިއާތަކާއި ނޫސްވެރިންނަށް މިހާރުވެސް ދިމާވަމުން އަންނަ ކަންބޮޑުވުންތަކަށް ބިލުން ހައްލެއް ނުލިބޭނެ ކަމަށް ޝަގީފް ވިދާޅުވިއެވެ. އެހެންކަމުން ޝަގީފް ހުށަހެޅުއްވީ ކަމާ ގުޅުންހުރި ފަރާތްތަކާއި ފުޅާ ދާއިރާއެއްގައި މަޝްވަރާ ކުރުމަށްފަހު ބަންޑާރަ ނާއިބުގެ އޮފީހުން އަލުން ބިލެއް ހުށަހެޅުމެވެ.

އޭނާ ވިދާޅުވީ މިހާރު ހުށަހަޅާފައިވާ ބިލު އިސްލާހު ކުރެވޭނެ ކަމަށް ގަބޫލުފުޅު ނުކުރައްވާ ކަމަށެވެ. އެހެންކަމުން އޭނާ ގޮވާލެއްވީ ބިލު ބޭރު ކުރުމަށެވެ.

އެމްއެމްސީގެ އިތުރުން ކޮމެޓީން ވަނީ ބިލާ ގުޅޭ ގޮތުން ބްރޯޑްކާސްޓިން ކޮމިޝަނުގެ ހިޔާލުވެސް ހޯދައިފައެވެ.

ކޮމިޓީއަށް ހާޒިރުވި ބްރޯޑްކާސްޓިން ކޮމިޝަންގެ މެމްބަރުން ވަކިވަކިން ބިލާ ގުޅޭ ގޮތުން ވާހަކަ ދެއްކެވިއެވެ. އެ ކޮމިޝަންގެ ކޮންމެ މެމްބަރަކު ވެސް ތަކުރާރުކޮށް ވިދާޅުވީ ފުރިހަމަ ދިރާސާއަކަށްފަހު، އެ ބިލު އެކުލަވާލަންޖެހޭ ކަމަށެވެ.

ބްރޯޑްކާސްޓިން ކޮމިޝަންގެ ރައީސް ޞަފާ ޝަފީޤު ވިދާޅުވީ އެ ބިލު ޑްރާފްޓް ކުރެއްވިއިރު، އެ ކޮމިޝަނާ މަޝްވަރާ ކުރެއްވި ނަމަ ރަނގަޅުވީސް ކަމަށެވެ. މީޑިއާ ބިލުގައި އޮންލައިން މީޑިއާތަކާއި ނޫސްތަކާއި ބްރޯޑްކާސްޓަރުންގެ އިތުރުން ސޯޝަލް މީޑިއާ ވެސް ރެގިއުލޭޓް ކުރަންޖެހޭ ގޮތަށް އޮތުމުން އެކަމުގެ ކަންބޮޑުވުން ސަފާ ފާހަގަ ކުރެއްވިއެވެ.

އޭނާ ވިދާޅުވީ މީޑިއާ ރެގިއުލޭޓް ކުރުމަށްޓަކާ އޮންނަންޖެހޭނީ ސެލްފު-ރެގިއުލޭޓަރީ ނިޒާމެއްތޯ ތޯ ނުވަތަ ކޯ-ރެގިއުލޭޓަރީ ބޮޑީއެއްތޯ ސުވާލު އުފެއްދެވިއެވެ. ސަފާތު ވާހަކަ ނިންމާލައްވަމުން ވިދާޅުވީ ގައުމީ ފެންވަރުގައި ދިރާސާއެއްކޮށްގެން ބިލު ތައްޔާރު ކުރުމަށެވެ.