ސިނަމާލެ ބްރިޖަކީ ރާއްޖެ އާއި ޗައިނާއާ ދެމެދު އޮންނަ ގާތް ގުޅުމުގެ ވަރުގަދަ ހެއްކެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ ޗައިނާގެ އެހީތެރިކަމާއެކުގައި ކުރިޔަށް ގެންގޮސްފައިވާ ސިނަމާލެ ބްރިޖަށް ހަތް އަހަރު ފުރުމުގެ ގޮތުން އެކްސްގައި ކުރެއްވި ޕޯސްޓެއްގައެވެ.

އެ ޕޯސްޓުގައި ރައީސް ވިދާޅުވީ ސިނަމާލެ ބްރިޖް މަޝްރޫއު އަކީ ރާއްޖެ ކުރިއަރައި ދިއުމުގައި ހުޅުވުނު ވަރަށް މުހިންމު ދޮރޯއްޓެއް ކަމަށެވެ.

އެއޯ ދިވެހިރާއްޖެއާ ޗައިނާއާއި ދެމެދު އޮތް އިތުބާރާއި ދެ ގައުމުގެ ގުޅުމުގެ ވަރަށް ފުރިހަމަ ރަމްޒެއް ކަމަށް ރައީސް ވިދާޅުވިއެވެ. އަދި އެއީ ރާއްޖޭގެ ތަރައްޤީގެ ޙަޤީގީ ބައިވެރިއެއްގެގޮތުގައި ޗައިނާއިން އޮތްކަން ދައްކުވައިދޭ ރަމްޒެއްކަމަށްވެސް އެމަނިކުފާނު ވިދާޅުވިއެވެ.

ސިނަމާލެ ބުރިޖުގެ މަސައްކަތް 2014 ވަނަ އަހަރު ފަށައި، 3 އަހަރާއި 11 މަސް ދުވަހުން ނިމި، 2018 ވަނަ އަހަރުގެ އޮގަސްޓް މަހުގެ 30 ގައި ކުލަގަދަ ރަސްމިއްޔާތަކާއެކު ހުޅުވުނެވެ.

މި ބުރިޖަށް ޖުމްލަ 300 މިލިޔަން ޑޮލަރު ޚަރަދުވިއެވެ. އޭގެ ތެރޭގައި ޗައިނާ ސަރުކާރުން ހިލޭ އެހީގެ ގޮތުގައި ދިން 100 މިލިޔަން ޑޮލަރާއި، ލޯނު އެހީގެ ގޮތުގައި ދިން 170 މިލިޔަން ޑޮލަރު އަދި ދިވެހި ސަރުކާރުން ޚަރަދުކުރި 30 މިލިޔަން ޑޮލަރު ހިމެނެއެވެ.

ރާއްޖެއާއި ޗައިނާއާއި ދެމެދު އޮންނަ ގުޅުން ރަމްޒުކޮށްދޭ މި ބުރިޖުގެ ދިގުމިނުގައި 1.39 ކިލޯމީޓަރު އަދި ފުޅާމިނުގައި 20.3 މީޓަރު ހުރެއެވެ. މި ބުރިޖުގައި ހަތަރު ފުރޮޅުލީ އުޅަނދުތަކަށް ޚާއްޞަ 2 ލޭނާއި، ސައިކަލް ދުއްވަން ޚާއްޞަ 2 ލޭން ހުރެއެވެ. މި މަޝްރޫޢުން މާލެ، ހުޅުލެ އަދި ހުޅުމާލެ ގުޅާލެވުނެވެ.