މަސްތުވާތަކެތި އެތެރެކޮށް، އޭގެ ވިޔަފާރި ކުރާ މީހުންނަށް މަރުގެ އަދަބު ދޭން ގާނޫނުގައި ހިމެނުމަށް ކަމާ ގުޅޭ އިދާރާތަކަށް ދަންނަވާފައިވާނެ ކަމަށް ރައީސް ޑރ. މުހައްމަދު މުއިއްޒު ދެންމެ ވިދާޅުވެއްޖެއެވެ.

ރައީސް މުއިއްޒު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ މަސްތުވާތަކެތީގެ ވަބާއިން ދިވެހި މުޖްތަމައު ސަލާމަތްކޮށް، މަސްތުވާތަކެތިން ދުރުހެލިވެފައިވާ ޖީލެއް ބިނާކުރުމަކީ ސަރުކާރުގެ އެންމެ މުހިންމު އެއް އަމާޒު ކަމަށެވެ.

‏އެގޮތުން، މަޖިލީހަށް މިހާރު ހުށަހަޅާފައިވާ މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލްގައި، މަސްތުވާތަކެތި އެތެރެކުރުމުގެ ނުވަތަ ވިޔަފާރިކުރުމުގެ ކުށް ސާބިތުވާ ފަރާތްތަކަށް ދުނިޔޭގެ ބައެއް އެހެން ގައުމުތަކުގައި ވެސް ކަން ކުރާ ގޮތަށް، މަރުގެ އަދަބު ހިމެނޭހެން ބޮޑެތި އަދަބުތައް ކަނޑައެޅުމަށްޓަކައި އެ ބިލް އިތުރަށް ދިރާސާކުރުމަށް ސަރުކާރުގެ ކަމާގުޅުން ހުރި އިދާރާތަކަށް ވާނީ މިހާރު ދަންނަވާފައި ވާނެ ކަމަށް ރައީސްގެ ޕޯސްޓުގައިވެއެވެ.

ދުނިޔޭގެ ގާތްގަނޑަކަށް 35 ގައުމެއްގައި ރައީސް އެ ވިދާޅުވި ފަދައިން މަސްތުވާތަކެތި އެތެރެކޮށް ވިޔަފާރި ކުރާ މީހުންނަށް މަރުގެ އަދަބު ދިނުމަށް ގާނޫނުތަކުގައި ހިމަނާފައިވެއެވެ. ނަމަވެސް މި ގައުމުތަކުގެ ތެރެއިން ގާނޫނުތަކުގައިވާ ގޮތަށް މަރުގެ އަދަބު ދެނީ ހަ ގައުމަކުންނެވެ. އޭގެތެރޭގައި އީރާނާއި ސައުދީ އަރަބިއްޔާ އާއި ސިންގަޕޫރާއި ޗައިނާ އަދި ވިއެޓްނާމްގެ އިތުރުން ނޯތު ކޮރެއާ ހިމެނެއެވެ.