ޝަރުތު ހަމަވި ހުރިހާ ދަރިވަރުންނަށް ލޯނު ދޭން ރައީސް ޑރ. މުހައްމަދު މުއިއްޒު އަންގަވައިފިއެވެ.

ސްޓޫޑަންޓް ލޯނަށް އެދި 1،338 ދަރިވަރުން ކުރިމަތިލާފައިވާ ކަމަށާއި މީގެތެރެއިން ޝަރުތު ހަމަވީ 806 ދަރިވަރުން ކަމަށް ހަޔާ އެޑިއުކޭޝަން މިނިސްޓްރީން ވަނީ އިއުލާން ކޮށްފައެވެ. ލޯން ސްކީމަށް ހުޅުވާލީ 500 ފުރުސަތެވެ.

ލޯނު ލިބޭ ދަރިވަރުންގެ ވަގުތީ ލިސްޓެއް ހަޔާ އެޑިއުކޭޝަން މިނިސްޓްރީން ވަނީ އާއްމު ކޮށްފައެވެ. އެ މިނިސްޓްރީން ބުނީ ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށެވެ.

ރައީސް މުއިއްޒު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެ އާއި ރާއްޖޭން ބޭރުން މަތީ ތައުލީމު ހާސިލުކުރުމަށް ދޫކުރާ ލޯނު ސްކީމަށް މި އަހަރު ކުރިމަތިލާ ޝަރުތު ހަމަވެފައިވާ ހުރިހާ ދަރިވަރުންނަށް، ލޯނު ދޫކުރުމަށް ކަމާބެހޭ މިނިސްޓްރީތަކަށް އަންގަވާފައިވާ ކަމަށެވެ.

އެހެންކަމުން ޝަރުތު ހަމަވި 806 ދަރިވަރުންނަށް މިއަހަރު ލޯނިު ލިބިގެން ދާނެއެވެ.