މާލެ ސިޓީ ކައުންސިލްގެ ބިންތަކާއި އެ ބިންތަކުގެ ސައިޒު ހިމެނޭ ލިސްޓު އާންމުނުކޮށްގެން ކަންބޮޑުވުންފާޅު ކުރަމުންދަނިކޮށް، އެ ލިސްޓު އާންމު ކުރައްވާނެ ކަމަށް މާލޭ މޭޔަރު އާދަމް އާޒިމް ވިދާޅުވެއްޖެއެވެ.

މާލޭ ސިޓީ ކައުންސިލްގެ ބިންތަކާއި އެ ބިންތައް ކުއްޔަށް ދީފައިވާ މުއްދަތުތަކާއި ކުލީގެ އަދަދާއި އެ ބިންތައް ދީފައިވާ ކުންފުނިތަކުގެ ހޯދުމަށް އެދި ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު މޭޔަރު އާޒިމަށް ފޮނުވި ސިޓީ، ސޯޝަލް މީޑިއާގައި އިއްޔެ ވަނީ އާންމުކޮށްފައެވެ.

ސައިފް އެ ސިޓީގައި ވިދާޅުވެފައި ވަނީ އެ ލިސްޓު ހިއްސާކުރުމަށް އެއް ފަހަރަށްވުރެ ގިނަ ފަހަރު އާޒިމް އަރިހުގައި އެދިވަޑައިގެންފައިވާނެ ކަމަށާއި ކައުންސިލްގެ ތިން ބައްދަލުވުމެއްގައި އެކަން ފާހަގަ ކުރެއްވި ކަމަށެވެ.

ސައިފުގެ އެ ވާހަކަތަކާ ގުޅިގެން ރާއްޖެޓީވީގެ ފަލަސުރުހީ ޕްރޮގްރާމްގައި އާޒިމް ރޭ ވިދާޅުވީ އެ ލިސްޓު، ޝާއިއުކުރާ ހިސާބަށް ގޮސްފައިވާ ކަމަށާއި އެ ލިސްޓް ނިމިފައި އޮތްކަން ސައިފަށް އެނގިވަޑައިގަންނަވާނެ ކަމަށެވެ. އަދި ވިދާޅުވީ އެ ލިސްޓު އާންމުކުރާއިރު "މިސްޓޭކެއް" ނެތްކަން ޔަގީންކުރަން ޖެހޭނެ ކަމަށެވެ.

އާޒިމް ވިދާޅުވީ އޭނާ މޭޔަރުކަމާ ހަވާލުވިއިރު، ސިޓީ ކައުންސިލަކީ "ބޮއްސުންލައި، ފުނޑުފުނޑުވެފައި އޮތް" ތަނެއް ކަމަށާއި މާލޭ ސިޓީ ކައުންސިލްގެ ވޭތުވެދިޔަ 15 އަހަރު އާންމުނުކޮށް އޮތް، އެ ކައުންސިލްގެ ބިންތަކުގެ ލިސްޓު އޭނާގެ މޭޔަރުކަމުގައި ޝާއިއުކުރައްވާނެ ކަމަށެވެ.

15 އަހަރު ދުވަހު ކައުންސިލުން ނުވެ އޮތް ކަންތައް އަޅުގަނޑުގެ މި މޭޔަރުކަމުގައި، އާދަމް އާޒިމްގެ މޭޔަރުކަމުގައި މި ދެ އަހަރު ތެރޭގައި އޭތި ރައްޔިތުންނަށް ޕަބްލިޝްކޮށްދޭނަން
އާދަމް އާޒިމް، މާލޭގެ މޭޔަރު

ރައްޔިތުންނަށް ނޭނގި މާލޭގެ ބިންތައް ދެމުންދާ ކަމަށް ސައިފް ކުރެއްވި ތުހުމަތު ތަކަށް ވެސް އާޒިމް ރޭ ޖަވާބު ދެއްވިއެވެ. އޭނާ ވިދާޅުވީ އެ ބިންތައް ދޫކޮށްފައި ވަނީ ސައިފްގެ ވެސް ވޯޓާ އެކުގައި ކަމަށެވެ.

"އިވެލުއޭޝަން ބިޑްތައް އައީމަ، އެ ބިޑުތައް ނިންމައި އެ އިވެލުއޭޝަންތައް ކައުންސިލްގެ ފްލޯއަށް ހުށަހެޅުމުން އެބޭފުޅާގެ ވޯޓާ އެއްކޮށް ފާސްކޮށްގެން އެ ބިންތައް އެ ހެރީ ދީފައި. ތިމަންނާއަކަށް ނޭނގޭ، ރައްޔިތުންނަށް ނޭނގެއޭ ބުނެ އެއީ ސީދާ އޮޅުވާލުން. އެކަހަލަ ކަންކަން ނުކުރުމަށް އެ ކުދިންނަށް އަޅުގަނޑު އިލްތިމާސްކުރަން،" އާޒިމް ވިދާޅުވިއެވެ.