ފަސް މިލިއަން ގަސް އިންދުމުގެ ޕްރޮގްރާމުގައި އެމްއޭސީއެލް އިން ބައިވެރިވެއްޖެ، އަމާޒަކީ އެއްލައްކަ ގަސް އިންދުން

ސަރުކާރުގެ މެނިފެސްޓޯގައި ހިމެނޭ މުހިންމު ރިޔާސީ ވައުދެއްކަމުގައިވާ، ފަސް މިލިއަން ގަސްއިންދުމުގެ ޕްރޮގްރާމްގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބައިވެރިވެއްޖެއެވެ.

އެމްއޭސީއެލް އިން މިއަދު ވަނީ އަންނަ މަހު ހުޅުވާ ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އައު ޓާމިނަލް ކައިރީގައި ގަސް އިންދައިފައެވެ. މިއަދުގެ ގަސް އިންދުމުގައި އެމްއޭސީއެލްގެ މެނޭޖިން ޑިރެކްޓަރާއި ކުންފުނީގެ އިސްވެރިންނާއި އެންވަޔަރަމަންޓް މިނިސްޓަރު ތާރިގް އިބްރާހީމް ވެސް ބައިވެރިވެވަޑައިގަތެވެ.

އެމްއޭސީއެލް އިން ބުނީ މިއަހަރުގެ ތެރޭގައި ރާއްޖޭގެ އެކި ސަރަހައްދުތަކުގައި 100،000 ގަސް އިންދުމަކީ އެކުންފުނީގެ އަމާޒެއް ކަމަށެވެ.

ފަސް މިލިއަނ ގަސް އިންދުމުގެ ޕްރޮގްރާމް މިދިޔަ އަހަރުގެ ޖޫން މަހުގެ ފަސްވަނަ ދުވަހު ފައްޓަވައިދެއްވީ ރައީސް ޑރ. މުހައްމަދު މުއިއްޒެވެ.

ރައީސް އޮފީހުން އޭރު ބުނީ އެ ޕްރޮގްރާމުން ދައްކުވައިދެނީ، ރާއްޖޭގެ ނާޒުކު ތިމާވެށީގެ ނިޒާމުތައް ހިމާޔަތްކުރުމަށާއި، މޫސުމަށް އަންނަ ބަދަލުތަކުގެ ސަބަބުން މިހާރުގެ ޖީލުތަކާއި، އަންނަން އޮތް ޖީލުތަކުގެ ލާބައާއި މަންފާއަށްޓަކައި މޫސުމަށް އަންނަ ބަދަލުތަކުންކުރާ ނޭދެވޭ އަސަރުތަކުން އަރައިގަތުމަށް ސަރުކާރުން ކުރަމުން ގެންދާ މަސައްކަތްތައް ކަމަށެވެ.