ފަލަސްތީނުގެ ހައްގުގައި އަޑުއުފުލަން ރާއްޖޭން އަބަދުވެސް ދެމި އޮންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރާއްޖެއަށް ފަލަސްތީނުން ކަނޑައަޅާފައި ހުންނެވި ސަފީރު، އިހާބް އިބްރާހީމް މުޙައްމަދު ޚަލީލްގެ ސަފީރުކަމުގެ ފަތްކޮޅު އެރުވުމަށް ބޭއްވި ރަސްމިއްޔާތުގައެވެ.

އެ ރަސްމިއްޔާތުގައި ސަފީރު ވަނީ ފަލަސްތީނުގެ ހައްގުގައި ދިވެހިރާއްޖެއިން ސާބިތުކަމާއެކު ދެއްވަމުންގެންދަވާ އެއްބާރުލުން ފާހަގަކުރައްވައި، އެކަމުގެ އަގުވަޒަންކުރައްވާކަން ހާމަކުރައްވާފައެވެ.

އަދި ފަލަސްތީނުގެ ހައްގުގައި ދިވެހިރާއްޖެއިން ބައިނަލްއަގުވާމީ މައިދާނުގައި މެދުނުކެނޑި އަޑުއުފުލަމުން ދާދިއުމުގެ މުހިންމުކަމުގެ މައްޗަށްވެސް އެމަނިކުފާނު ވަނީ އަލިއަޅުއްވާލައްވާފައެވެ.