ފުވައްމުލަކު ސިޓީގައި ރޭ ހިނގި މާރާމާރީއެއްގައި ޒުވާނަކަށް އަނިޔާވެއްޖެއެވެ.

މިކަމުގެ މައުލޫމާތު ހިއްސާ ކުރަމުން ފުލުހުން މިއަދު ބުނީ ފުވައްމުލަކުގައި މީހެއްގެ ގައިގާ ޖަހާ މާރާމާރީ ހިންގާފައިވާ މައްސަލައެއް ރޭ 20:54 ހާއިރު ފުލުހުންނަށް ރިޕޯޓު ކޮށްފައިވާ ކަމަށެވެ.

އެ މާރާމާރީގައި އަނިޔާވެފައި ވަނީ އުމުރުން 18 އަހަރުގެ ދިވެހި ފިރިހެނަކަށް ކަމަށް ފުލުހުން ބުންޏެވެ. އޭނާ އަށް ލިބިފައިވާ އަނިޔާތަކުގެ ތެރޭގައި ނޭފަތާއި އަނގަމަތި ފަޅައިގެން ގޮސްފައިވާ ކަމަށް ފުލުހުން ބުންޏެވެ. އަދި ކަނާތު ކޯމަތިވެސް ދުޅަވެފައިވާ ކަމަށް ފުލުހުން ބުންޏެވެ.

ފުލުހުން ބުނި ގޮތުގައި އޭނާ އަށް ލިބިފައިވާ އަނިޔާތަކަށް ފަރުވާ ހޯދުމަށް އައްޑޫ ސިޓީއަށް ގެންގޮސްފައިވާ ކަމަށެވެ.

އަދި އެ މައްސަލަ ފުލުހުން ތަހުގީގު ކުރަމުން އަންނަ ކަމަށްވެސް ބުންޏެވެ.