މިއަހަރު ރާއްޖޭން ހައްޖުގެ އަޅުކަން އަދާ ކުރުމަށް މައްކާއަށް މިވަގުތު ގޮސްފައިވާ ހައްޖާޖީން މިރޭ މިނާ އަށް ދިއުމަށް ދަތުރު ފަށާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

މިނިސްޓަރު ޝަހީމް މިރޭ މީޑިއާތަކުގެ ވަޓްސްއަޕް ގްރޫޕަށް ކުރެއްވި މެސެޖެއްގައި ވިދާޅުވީ ރާއްޖޭގެ ހައްޖުވެރިން މިނާ ދިއުމަށް މިރޭ ދަތުރު ފަށާނެ ކަމަށާއި އެންމެހައި ޙައްޖުވެރިންގެ ހާލު ވެސް ރަނގަޅުކަމުގައި ދިވެހި ޙައްޖު މިޝަންއިން މައުލޫމާތު ދެއްވާ ކަމަށެވެ.

"ދިވެހި ހައްޖުވެރިންނަށްޓަކައި ހައްޖު ކޯޕަރޭޝަނުން މިނާގައި ވަނީ ފުރިހަމަ އިންތިޒާމްތަކެއް ކޮށްފައި،" ޝަހީމް ވިދާޅުވިއެވެ.

ރާއްޖޭން މިއަހަރު ހައްޖަށް ގޮސްފައިވާ ފަރާތްތަކަށް ވަނީ މީގެކުރިން ނުލިބޭ އެތައް ލުއިތަކެއް ލިބިފައެވެ. އޭގެތެރެއިން އެންމެ މުހިއްމު އެއް ލުއިއަކީ، މައްކާ ރޫޓް އިނީޝިއޭޓިވްއެވެ.