ކުރީގެ ފިރިމީހާއާ މިހާރުގެ ލޯބިވެރިޔާއާ ދެމެދު މާރާމާރީއެއް ހިނގާ ބަޔަކަށް އަނިޔާވެއްޖެއެވެ.

މި ހާދިސާ ހިނގާފައި ވަނީ މިއަދު މެންދުރު 13:00ހާއިރު، ހުޅުމާލޭގެ ބުރަވިގަސް މަގުގައި ހުރި ލޮޓެއް ކައިރީގައެވެ.

ފުލުހުން ބުނީ އެ މާރާމާރީ ހިނގީ އަންހެނެއްގެ ކުރީގެ ފިރިމީހާ އާއި މިހާރުގެ ލޯބިވެރިޔާއާ ދެމެދު ކަމަށެވެ. އަދި އެ ދެ މީހުންގެ މާރާމާރީގެ ތެރެއަށް އާއިލާގެ ބަޔަކު ވަދެ އިތުރަށް ހަމަނުޖެހުން ހިންގާފައިވާ ކަމަށް ފުލުހުން ބުންޏެވެ.

އެ މާރާމާރީގައި އެކެއްގެ ބޯ ފަޅައިގެން ގޮސްފައިވާއިރު އިތުރު މީހަކަށް އެކިވަރުގެ ކުދި އަނިޔާ ލިބިފައިވާ ކަމަށް ފުލުހުން ބުނެއެވެ. އެ ދެ މީހުންނަށް ވެސް ހޮސްޕިޓަލުން ފަރުވާ ދިނުމަަށްފަހު މިހާރު ވަނީ ދޫކޮށްލައިފައެވެ.

އެ މާރާމާރީއާ ގުޅިގެން އެ ދެ މީހުންވެސް ފުލުހުންގެ ބެލުމުގެ ދަށަށް ގެނައެވެ. އެ މައްސަލަ ފުލުހުން އަންނަނީ ތަހުގީގު ކުރަމުންނެވެ.