މާލެ ސިޓީ ނެގުމަށްފަހު ރާއްޖޭގެ އެންމެ ބޮޑު އާބާދީއެއް އޮންނަ އައްޑޫ ސިޓީގެ ލިންކް ރޯޑް ތަރައްގީ ކުރުމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާ ހަވާލުކޮށްފިއެވެ.

ހައުސިން މިނިސްޓްރީގައި އޮތް ރަސްމިއްޔާތެއްގައި އެ މަސައްކަތް އާރްޑީސީއާ ހަވާލު ކުރުމަށް ހައުސިން މިނިސްޓްރީގެ ފަރާތުން ސޮއި ކުރެއްވީ މިނިސްޓަރު މުއްތަލިބެވެ. އާރްޑީސީގެ ފަރާތުން ސޮއި ކުރެއްވީ އެކުންފުނީގެ މެނޭޖިން ޑިރެކްޓަރު ބްރިގޭޑިއާ ޖެނެރަލް (ރޓޔޑ) އަލީ ޒުހައިރެވެ.

އާރްޑީސީއާ އެ މަސައްކަތް ހަވާލުކުރީ 829 މިލިއަން ރުފިޔާއަށެވެ. އެ މަސައްކަތް ހަވާލުކުރީ 1440 ދުވަސް ތެރޭގައި މަސައްކަތް ނިންމާ ގޮތަށެވެ.

އެ މަޝްރޫއު އެކުލެވިގެން ވަނީ ލިންކް ރޯޑް ޒަމާނީ ފެންވަރަށް ހެދުމާއި 67.58 ކިލޯމީޓަރުގެ ސީޓީބީ އަޅާފައިވާ މަގުތަކުގައި ތާރު ނުވަތަ ގާ އެޅުމުގެ އިތުރުން ސ.ފޭދޫގައި ފެން ހިންދާ ނިޒާމް ގާއިމް ކުރުމެވެ.

އެ މަޝްރޫއުގެ ތެރޭގައި ލިންކް ރޯޑް ޒަމާނީ ފެންވަރަށް އަލުން ހަދައި ތަރައްގީ ކުރުމާއި ސީޓީބީ މަގުތަކުގައި ތާރު ނުވަތަ ގައު އަތުރައިގެން މަގު ހެދުމާއި ދުވާރުތައް ހެދުމުގެ އިތުރުން ފެން ހިންދާ ނިޒާމް ގާއިމް ކުރުން ހިމެނެއެވެ. އަދި ރޯޑް މާކިން އަދި ސައިން ބޯޑް ހަރުކުރުން ވެސް ހިމެނެއެވެ.