ރައްޔިތުން މަޖިލިސް މެންބަރުންގެ މުސާރަ ކުޑަ ކުރުމަކީ ރަނގަޅު ހިޔާލެއް ކަމަށާއި އެހެންނަމަވެސް އެކަން ކުރަން ވާނީ އައު މަޖިލިސް ދައުރަކަކާއެކު ކަމަށް ރައްޔިތުން މަޖިލީހުގެ މެޖޯރިޓީ ލީޑަރު، އިނގުރައިދޫ ދާއިރާގެ މެންބަރު އިބްރާހީމް ފަލާހް ވިދާޅުވެއްޖެއެވެ.

ރައްޔިތުންގެ މަޖިލީހުގެ މެންބަރުންގެ ލިބޭ މުސާރައާއި ބައެއް އިނާޔަތްތައް ކުޑަކުރަން ގޮވާލައި އޮންލައިން ޕެޓިޝަނެއްގައި ސޮއިކުރަން ވަނީ ފަށައިފައެވެ.

އެ ޕެޓިޝަނަކީ މެންބަރުންގެ މުސާރަ ކުޑަކޮށް ކޮމިޓީ އެލަވަންސް އުނިކުރުމުގެ އިތުރުން މެންބަރުންނާއި އެ ބޭފުޅުންގެ އާއިލާތަކަށް މިހާރު ދޭ ހާއްސަ ހެލްތު އިންޝުއަރެންސް ކަނޑާލައި ކުރީގެ މެންބަރުންނަށްށް ދޭ އެލަވަންސް ކަނޑާލުމާއި ގުޅޭ ޕެޓިޝަނެކެވެ.

މިކަމާއި ގުޅޭ ގޮތުން ފަލާހް އެކްސްގައި ކުރެއްވި ޕޯސްޓެއްގައި މިއަދު ވިދާޅުވީ މެންބަރުންގެ މުސާރަ ކުޑަ ކުރުމަކީ ގޯސް ހިޔާލެއް ނޫން ކަމަށެވެ. ފަލާހް ތުހުމަތު ކުރެއްވި ގޮތުގައި 19ވަނަ ރައްޔިތުން މަޖިލީހުގެ ސުޕަރމެޖޯރިޓީ އޮތް، އެމްޑީޕީން އޭރުގެ މަޖިލިސް ނިންމާލާފައި ދިޔައީ ކޮންމެ މެންބަރެއްގެ މުސާރަ އެއްލައްކަ ރުފިޔާ އަށް ހަދަން ކަމާ ގުޅުންހުރި ކޮމެޓީން ފާސްކޮށްފައި ކަމަށެވެ.

ނަމަވެސް އެކަން އެގޮތަށް ނުކުރަން ރައީސް ޑރ. މުހައްމަދު މުއިއްޒު އިރުޝާދު ދެއްވާފައިވާ ކަމަށް ފަލާހް ވިދާޅުވިއެވެ.

"ހަމައެއާއެކު އަޅުގަނޑުގެ ވިސްނުން ދަންނަވަން. މަޖިލީސް މެމްބަރުންގެ މުސާރައަށް ބަދަލުގެނައުން ރަނގަޅީ މަޖިލީސް ދައުރެއް ނިމި އާ ދައުރެއްގެ އިންތިހާބަށް. ސަބަބަކީ އެތައް މިލިއަން ރުފިޔާ ހަރަދުކޮށް މަޖިލީހަށް ވަންނަ ތަނުން މުސާރަ ކުޑަކޮށްލުމުން އިިންތިހާބަށް ނެގި ދަރަނި އަދާކުރާނެ ގޮތެއް ނޯންނާނެ. ވީމަ އަލަށް 21ވަނަ މަޖިލީހަށް މެމްބަރަކަށް 5000 ރުފިޔާ ކަނޑައެޅީމަ އެމުސާރަ އޯކޭވެގެން ކުރިމަތިލާ މެމްބަރުންނަކަށް ޝަކުވާކުރެވޭކަށް ނޯންނާނެ،" ފަލާހް ވިދާޅުވިއެވެ.

މީގެއިތުރުން ފަލާހް ވަނީ ކުރީގެ ރަޢީސުންގެ އިނާޔަތާމެދުވެސް ވިސްނާލުން މުހިއްމު ކަމަށް ވިދާޅުވެފައެވެ. އަދި އެ ޕެޓިޝަނުގައި ފަނޑިޔާރުންގެ ނަން ވެސް ހިމަނާލި ނަމަ ރަނގަޅުވީސް ކަމަށް ވެސް ވިދާޅުވިއެވެ.